N̄wed Eset Emi Osụk Enyenede Ufọn Mfịn
Ediwak owo ẹnịm ke Bible edi N̄wed Abasi. Enye etịn̄ nte ikpokponode Abasi. Edi idịghe nte ẹkpekponode Abasi kpọt ke Bible etịn̄. Enye etịn̄ n̄ko nte owo okpodude uwem ke usen ke usen, ndien nti item Bible an̄wam ediwak owo.
Yak ise se ndusụk owo ẹtịn̄de ẹban̄a ufọn oro mmọ ẹdiade ke ntak emi mmọ ẹsikotde Bible ẹnyụn̄ ẹnamde item esie ke usen ke usen.
“Uwem enem mi idahaemi akan nte ekedide. Esịt itịmekede mi aba nte ekesitịmerede. Mmenen̄ede n̄kop inemesịt.”—Fiona.
“Ndikpep Bible anam n̄kop inemesịt nnyụn̄ mfiọk se n̄kpadade uwem mi nnam.”—Gnitko.
“Nte ndude uwem idahaemi ọfọn akan nte n̄kesidude. Ndaha aba ofụri ini mi nnam utom, ndien mmenen̄ede nnyene ini ndu ye ubon mi.”—Andrew.
Ediwak mbon en̄wen ẹtịn̄ ukem ikọ emi. Ediwak owo ke ofụri ererimbot ẹdọhọ ke item Bible esin̄wam mmimọ ifiọk nte ikpanamde n̄kpọ ke usen ke usen.
Yak ineme ndusụk nti item Bible emi aban̄ade . . .
Nsọn̄idem
Inemesịt
Ndikpere mbonubon ye mme ufan nnyịn
Okụk
Ndidi ufan Abasi
Mme ibuotikọ oro ẹtienede ẹyewụt ke Bible edi N̄wed Abasi, ẹnyụn̄ ẹwụt nte enye ekemede ndin̄wam fi ke nsio nsio usụn̄.