Nnyịn Iyom Ndinọ Un̄wam
Ẹtịm ekpri n̄wed emi ndinam fi otịm emehe ye utom Mme Ntiense Jehovah ye mme ndutịm oro mmọ ẹnamde ndin̄wam fi ọkọri ke ifiọk Bible. Ekeme ndidi Mme Ntiense Jehovah ẹma ẹwaha ẹtiene fi, mîdịghe iso-ọfọn afo ama enyene nneme ye mmọ ke efak m̀mê ke mme ebiet en̄wen. Ekeme ndidi owo kiet ke otu Mme Ntiense oro ke onịm ukpepn̄kpọ ye afo idahaemi.
Nte afo ama ọfiọk ete ke ẹtan̄a etop mmọ oro aban̄ade Obio Ubọn̄ Abasi ke ofụri ererimbot? Ntak-a? Ntak edi koro Abasi, Andibot nnyịn, oyomde mme owo ke kpukpru idụt ẹdiana kiet ẹtuak ibuot ẹnọ imọ. Enye ama ebemiso etịn̄ aban̄a eyo nnyịn ete: “Ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemọ, nnyịn iyenyụn̄ isan̄a ke usụn̄ esie.”—Isaiah 2:2, 3.
Utom Mme Ntiense Jehovah ke nditịn̄ nnọ fi mban̄a mme usụn̄ Abasi edi edisu oro prọfesi emi osude. Mme page ẹtienede mi ẹyewụt ntak utom emi edide akpan n̄kpọ idahaemi ye nte afo ekemede ndibọ ufọn nto enye.