Ndidara Nnyụn̄ Ntoro Abasi ke Mme Mbono
Toto ke ntọn̄ọ ntọn̄ọ iduọk isua 1880 Nditọ Ukpepn̄kpọ Bible ẹma ẹkụt ẹte, ke adianade ye mme mbonoesop n̄kann̄kụk, eyenyene ufọn ọnọ mmimọ ndimehe ye ekemmọ mme andinịm ke akpanikọ ẹmi ẹtode mme ebiet en̄wen. Ntre mmọ ẹma ẹtọn̄ọ ndidiomi ikpọ mbono eke Nditọ Ukpepn̄kpọ Bible ke isua ke isua ke ofụri United States, ndien ke ukperedem ke Canada nde. Mmọemi ekedi ini udemede ukpọn̄ ke n̄kan̄ eke spirit; koro ke ediwak usen ẹma ẹnọ ọkpọsọn̄ ukpepn̄kpọ Bible, ndien kpukpru owo ẹma ẹkop inem nneme nsịnudọn̄ otode edem mbiba. Ndinịm mbufa mme andinịm ke akpanikọ baptism ama akabade edi n̄kpọ oro adade itie kpukpru ini ke ikpọ mbono. Ẹma ẹda ikpọ mbono n̄ko ndinọ mbonan̄wa ntatara ikọ ntiense.—Rome 1:11, 12.
Mfịn Mme Ntiense Jehovah ẹsikop inem mme mbono kpukpru ini. Nte ido edide, ẹsitan̄ esop 18 osịm 25 ẹdian ọtọkiet ke se ẹkotde mme circuit, ẹmi mme esenyịn ẹmi ẹsan̄ade-san̄a ẹsikade ẹkese. Utịm ikaba ke isua, ẹsidiomi mme mbono ke ebiet mme esop ke circuit oro, m̀mê ubak circuit ẹsopde idem ọtọkiet ke Saturday ye/m̀mè Sunday.
Ini kiet ke isua, ẹsidiomi ikpọ mbono usen ita m̀mê inan̄, ẹmi ẹsikotde mme mbono district, ke idụt kiet kiet, ke ebiet emi ediwak tọsịn owo ẹkemede ndisop idem ọtọkiet ke ebiet kiet. Mbono ẹmi ẹsinọ Mme Ntiense Jehovah ye mbon en̄wen ẹmi ẹnyenede udọn̄ ke utom mmọ nsịnudọn̄ eke spirit, ndien mmọ n̄ko ẹsinọ an̄wan̄wa ikọ ntiense.
Edi Otu Ukara eke Mme Ntiense Jehovah ẹsinam ndutịm n̄kpri ye ikpọ mbono ẹmi ndien ẹsikọn̄ọ ke mme udọn̄ eke Mme Ntiense ke ofụri ererimbot. Enye esisịne mme utịn̄ikọ, nneme, ye mme edinam eke ata uwem ẹmi ẹsikotde mme nnamn̄wụt, ẹmi mme esenyịn ẹmi ẹsan̄ade-san̄a ye Mme Ntiense oro ẹdotde ke esop ẹsinọde. Nsio nsio owo n̄ko ẹsibụk mme ifiọkutom ẹban̄a nte mmọ ẹkande n̄kpọ-ata eke edidu uwem nte mme Christian ke ererimbot unana uten̄e Abasi m̀mê utịp ẹmi ẹnyenede ke an̄wautom. Ke mme mbono district, ikpehe efen esidu—kpa mme ata edinam ke uduot mme drama a-Bible m̀mê mme drama oro ẹtịmde ke ido eyomfịn, owụtde nte mme Christian ẹyọde mfịna ẹmi mmọ ẹsobode mfịn.
Ẹsinọ udia ye n̄kpọ ubịtitọn̄ n̄ko. Emi esiyak ẹdara ebuana ọtọkiet ke ini mbono mîtọn̄ọke kan̄a. Ofụri utom ẹmi abuanade ke edinam ẹmi ẹdi se mbon unyịmesịt ke otu Mme Ntiense Jehovah ẹsinamde. Ekọmurua n̄kpọutom ye ubiatokụk eken ẹdi se ẹsidade mme enọ imaesịt ẹse ẹban̄a. Ẹdụk ke mfọn, ndien owo ikamake usan isan̄a ibọ okụk.
Afo emekeme ndidụn̄ọde ke esop n̄kann̄kụk eke Mme Ntiense Jehovah man ọfiọk ini ye ebiet emi ẹsinịmde mbono ẹmi ke obio mbufo. Ẹyenọ fi ntọt n̄ko ẹban̄a ndutịm ukaisan̄ ekededi, ọkọrọ ye usụn̄ nte ekemede ndibọ itieidụn̄.
N̄kpri ye ikpọ mbono ẹmi ẹsin̄wam Mme Ntiense Jehovah ye kpukpru mmọemi ẹsibuanade ye mmọ ndikụt n̄kpọ mbe esop n̄kann̄kụk mmọ nnyụn̄ n̄wụt esịtekọm mban̄a ofụri ebuana nditọete mmọ ke ererimbot.—1 Peter 2:17.
• Nso mme ufọn ke akpa Nditọ Ukpepn̄kpọ Bible ẹkebọ ẹto ikpọ mbono mmọ?
• Tịn̄ nte ẹsidiomide ẹnyụn̄ ẹtịmde mme mbono circuit ye district.
[Mme ndise ke page 18]
Drama a-Bible ke mbono district, United States
Mbono ofụri ererimbot, Poland
Mbono ofụri ererimbot, Argentina
Mbono circuit, Japan
Mme andidụk mbono ẹbọ mme n̄wed a-Bible, Switzerland
Baptism ke mbono ofụri ererimbot, South Africa
Ndisio obufa n̄wed Bible, Canada
Mme andidụk mbono ẹdiana kiet ke ndikwọ ikwọ, Spain