Ndikpeme Otuerọn̄ Abasi ke Edidianakiet
Ndusụk owo ẹbụp ẹte: ‘Didie ke ẹkara esop ofụri ererimbot eke Mme Ntiense Jehovah?’ Nnyịn ibọrọ ite: Ndutịm ukara etiene uwụtn̄kpọ esop Christian eke akpa isua ikie.
Ke iduọk isua 1870, Charles T. Russell ye mme nsan̄a esie ẹma ẹtọn̄ọ ndisuan mme utịp ukpep Bible mmọ ebe ke mme utịn̄ikọ ye n̄wed. Ke ofụri idụt oro, mmọemi ẹkemekde ndibuana ke utom emi ẹkese Russell ye mme n̄kpet n̄kpet nsan̄a esie nte otu irenowo ẹmi ẹtịmde ẹnyene ifiọk ndinam utom Ọbọn̄, ẹmi mmọ ẹkemede ndibọ item aban̄ade mme utom mmọ.
Ke 1884 ẹma ẹtọn̄ọ Zion’s Watch Tower Tract Society ke idak ibet Obio Pennsylvania. Russell ye mme akpan nsan̄a esie ẹma ẹnyene n̄kpet n̄kpet ebuana ke ndida N̄ka emi usụn̄ ọkọrọ ye utom ẹmi Nditọ Ukpepn̄kpọ Bible ẹnamde. Ke 1909 mmọ ẹma ẹsio ibuot itieutom mmọ ẹka Brooklyn, New York. Ke ofụri isua ẹmi, mme esenyịn utom Watch Tower Society ye mbon eken oro ẹnyenede n̄kpet n̄kpet ebuana, ẹdotde ke n̄kan̄ eke spirit, ẹmi ẹyetde aran ẹmenam utom nte otu ukara Mme Ntiense Jehovah.
Otu Ukara esịne otu irenowo Christian (13 ke 1986) oro ẹyetde aran, esịnede owo 7 ẹmi ẹnamde utom nte otu mme esenyịn utom Watch Tower Society. Mmọemi ẹse ẹban̄a utom ofụri ererimbot eke Mme Ntiense Jehovah. Abasi inọhọ mmọ odudu spirit ndien ke ntre idịghe mme anana ndudue, edi mmọ ẹberi edem ke anana-ndudue Ikọ Abasi nte n̄kon̄ n̄kan odudu ke isọn̄, ẹnyụn̄ ẹnyene ifiọkutom eyouwem ke ndisụk idem nnọ uduak Abasi. Owo mmọ kiet kiet enyene mbụkutom oro ebede isua 40 ke utom uyọhọ-ini ye Mme Ntiense Jehovah.
Otu Ukara ese aban̄a se N̄ka emịn̄de. Se ẹwetde ọkọn̄ọ ke ndise mme n̄kpọ eke spirit oro otuerọn̄ ẹyomde ndien emi edi utịp otode akam ye ọyọhọ ukpepn̄kpọ ye edinam ndụn̄ọde ke Ikọ Abasi. Nte irenowo ẹmi ẹkade iso ndikpep Bible nnyụn̄ n̄kụt n̄kaiso edisu mme uduak Abasi, edisu prọfesi ke mme n̄kpọntịbe ererimbot, ye nte n̄kpọ etiede ye ikọt Abasi ke ererimbot, mmọ ke ndusụk ini ẹsikụt nte oyomde ẹnam mme edinen̄ede oro esịnede ifiọk ke ndidiọn̄ọ ndusụk ukpepn̄kpọ. Ke usụn̄ emi, ifiọk akpanikọ esidọdiọn̄ awak.—Psalm 97:11; Mme N̄ke 4:18; Daniel 12:4.
Otu Ukara ememek Kọmiti N̄kọk Itieutom ẹdide irenowo ita m̀mê ẹwakde ẹkan oro, ẹmi ẹdotde ke n̄kan̄ eke spirit ke kiet kiet ke otu n̄kọk itieutom ẹwakde ẹbe 90 ke ofụri ererimbot man ẹse ẹban̄a utom ke se iwakde ibe idụt ye otu isuo 200. Mme n̄kọk itieutom ẹmi ẹsinyene nneme ye esop ẹmi ẹdude ke idak edise enyịn mmọ. Otu Ukara esinyene nneme kpukpru ini ye Mme Kọmiti N̄kọk Itieutom, ndien mbon Otu Ukara ẹsika ke idemmọ ẹkese ediwak n̄kọk itieutom ke isua kiet kiet man ẹfiọk nte n̄kpọ ẹtiede.
Irenowo ẹmi idịghe mme andikara mbuọtidem mbon en̄wen edi ẹdi mme asan̄autom ẹmi ẹnamde utom ọkpọsọn̄ man ediwak mbon en̄wen ẹkpekeme ndikpep Ikọ Abasi. Mmọ inamke utom iyom udori okụk, edi ẹnọ mmọ se mmọ ẹyomde ke n̄kan̄ obụkidem ukem nte ẹnọde mbonufọk Bethel eken. N̄kpọ ndiwụt nte ke mmọ ẹnam utom ke edinam akpanikọ edi se ẹkụtde ke ifịk, edidianakiet, n̄kokon̄ edumbet ido uwem, ye edinam akpanikọ nnọ mme ukpepn̄kpọ Bible emi Mme Ntiense Jehovah ke ofụri ererimbot ẹwụtde.—1 Corinth 3:5-9; 4:1, 2; 2 Corinth 1:24; 3:1-3; 1 Peter 5:2, 3.
• Nso ndutịm ukara ikọtọn̄ọ?
• Mmanie ẹnam utom ke Otu Ukara mfịn, ndien nso idi mme mbiomo mmọ?
• Didie ke ẹse ẹban̄a utom ke mme idụt efen?
[Ndise obio ke page 26]
(Ama oyom ndikụt nte enye enen̄erede etie, se n̄wed)
Mme ebiet ẹmi Mme Ntiense Jehovah ẹnamde uduak Abasi
[Mme ndise ke page 26]
Mme Etieibuot Watch Tower Society
C. T. Russell, 1884-1916
J. F. Rutherford, 1916-1942
N. H. Knorr, 1942-1977
F. W. Franz, 1977-
[Mme ndise ke page 27]
Ibat ibat ke otu n̄kọk itieutom ẹwakde ẹbe 90 ẹmi ẹsede ẹban̄a utom Mme Ntiense Jehovah ke ofụri ererimbot
Canada
Zambia
Germany
Japan
Australia
Brazil