Ibuot 16
Ufụp Kaban̄a Utuakibuot Jehovah
NDITỌEKA iren Jesus—nditọ iren Mary eken—ẹdi James, Joseph, Simon, ye Judas. Mbemiso kpukpru mmọemi ẹnamde isan̄ ye Jesus ye mme mbet esie ẹka Capernaum, kpa obio emi ekperede Inyan̄ Galilee, iso-ọfọn mmọ ẹwaha kan̄a ufọk ke Nazareth man ubon emi ẹkeme nditan̄ mme n̄kpọ oro mmọ ẹdiyomde.
Edi ntak emi Jesus akade Capernaum, utu ke ndika iso ke utom ukwọrọikọ esie ke Cana, ke Nazareth, m̀mê ke ndusụk itie efen ke obot Galilee? N̄kpọ kiet edi, Capernanum odu ke itie emi ẹtịmde ẹdiọn̄ọ ndien nte an̄wan̄ade edi akamba obio. N̄ko, ediwak mbet oro Jesus ọkọde obufa ẹdụn̄ ke Capernaum m̀mê ke ebiet ekperede do, ntre mmọ idikpọn̄ke-kpọn̄ ufọk mmọ man ẹkebọ ukpep ẹto enye.
ke ini enye odude ke Capernaum, Jesus anam mme utịbe utom, nte enye ke idemesie akayarade owụt ọfiọn̄ ifan̄ ke ukperedem. Edi ibịghike Jesus ye mme nsan̄a esie ẹfiak ẹdaha isan̄. Edi ini-utọ, ndien mmọ ẹnam isan̄ ẹka Jerusalem man ẹkedụk usọrọ Passover eke 30 C.E. Ke adan̄aemi ẹdude do, mme mbet esie ẹkụt nte Jesus anamde n̄kpọ oro ndusụk akanam mmọ mîkwe.
Nte ekemde ye Ibet Abasi, nditọ Israel ẹkenyene ndiwa uwa unam. Ntre, man efere mmọ mbiomo, mme anyamurua ke Jerusalem ẹsinyam mme unam m̀mê mme inuen kaban̄a uduak emi. Edi mmọ ẹnyam ke ata esịt temple, ndien mmọ ẹtotụk mme owo ke ndibọ akamba ekọmurua.
Ke okopde iyatesịt, Jesus ada urụk anam ikpa onyụn̄ ebịn mme anyamurua oro osion̄o. Enye an̄wan̄a okụk mme okpụhọ okụk ọduọn̄ọ onyụn̄ onụk mme okpokoro mmọ ọduọn̄ọ. Enye ọdọhọ mme anyam ibiom oro ete: “Ẹtan̄ n̄kpọ ẹmi ẹnyọn̄ọ; ẹkûnịm ufọk Ete Mi ke ufọk mbubịne.”
Ke ini mme mbet Jesus ẹkụtde n̄kpọ emi, mmọ ẹti prọfesi oro aban̄ade Eyen Abasi: “Ufụp ufọk Fo eyedia mi.” Edi mme Jew ẹbụp ẹte: “Owụt nnyịn nso idiọn̄ọ emi Afo anamde n̄kpọ ẹmi?” Jesus ọbọrọ ete: “Ẹwụri temple emi, ndien nyediọn̄ enye ke usen ita.”
Mme Jew ẹkere ẹte ke Jesus etịn̄ aban̄a ata temple, ntre mmọ ẹbụp ẹte: “Ẹkeda isua aba-ye-itiokiet ẹbọp temple emi; nte Afo eyediọn̄ enye ke usen ita?” Nte ededi, Jesus etịn aban̄a temple ikpọkidem esie. Ndien isua ita ke ukperedem, mme mbet esie ẹti ikọ emi Jesus eketịn̄de ke ini ẹkenamde enye eset ke n̄kpa. John 2:12-22; Matthew 13:55; Luke 4:23.
▪ Ke usọrọndọ oro ke Cana ama okokụre, m̀mọ̀n̄ ke Jesus anam isan̄ aka?
▪ Ntak emi Jesus okopde iyatesịt, ndien nso ke enye anam?
▪ Nso ke mme mbet Jesus ẹti ke ẹkụtde edinam esie?
▪ Nso ke Jesus etịn̄ aban̄a “temple emi,” ndien nso ke ikọ esie ọwọrọ?