Ibuot 100

N̄ke Aban̄ade Okụk

ISO-ỌFỌN Jesus osụk odu ke ufọk Zacchaeus, ke ebiet emi enye akawahade ke isan̄ uka Jerusalem. Mme mbet esie ẹnịm ke akpanikọ ẹte ke mmimọ ima isịm Jerusalem, enye eyenam ẹdiọn̄ọ ẹte ke imọ idi Messiah onyụn̄ owụk Obio Ubọn̄ esie. Man enen̄ede ekikere emi onyụn̄ owụt ete ke Obio Ubọn̄ osụk ododu nsannsan, Jesus otop n̄ke kiet.

Enye obụk ete, “Ọbọn̄ kiet akaka anyan idụt, ndibọ ubọn̄ nda mfiak nnyọn̄.” Jesus edi “Ọbọn̄” oro, ndien heaven edi “anyan idụt” oro. Ke ini Jesus osịmde do, Ete esie eyenọ enye odudu nte edidem.

Nte ededi, mbemiso adahade, ọbọn̄ oro okot ifụn esie duop onyụn̄ ọnọ mmọ owo kiet kiet okụk silver kiet, ọdọhọde ete: “Ẹda emi ẹnyam urua tutu ndi.” Ifụn duop oro ke akpa edisu ẹda ẹban̄a mme akpa mbet Jesus. Ke ntatara edisu, mmọ ẹda ẹban̄a kpukpru mbon oro ẹnyenede idotenyịn nte mme ada-udeme ye enye ke Obio Ubọn̄ heaven.

Okụk silver oro edi ọsọn̄urua okụk, kiet kiet ọdọkde osịm n̄kpọ nte okụk utom ọfiọn̄ ita oro ẹnọde anamutom in̄wan̄. Edi okụk oro ada aban̄a nso? Ndien nso orụk urua ke ifụn ẹmi ẹnyene ndida mmọ nnyam?

Okụk oro ẹda ẹban̄a inyene oro mme mbet ẹmi ẹbonde ke spirit ẹkemede ndida nnam n̄kpọ ke ndision̄o mme ada-udeme Obio Ubọn̄ heaven efen efen ndi tutu edifiak ndi Jesus nte Edidem Obio Ubọn̄ oro ẹken̄wọn̄ọde. Ke enye ama ekeset ke n̄kpa onyụn̄ owụt mme mbet esie idem, enye ama ọnọ mmọ ndamban̄a okụk ndida nnam ediwak mbet ndien ke ntre ẹdiande mbet ke otu mbon oro ẹdade Obio Ubọn̄ heaven ẹnyene.

Jesus akaiso ete, “Edi mbio obio esie ẹsua [ọbọn̄ oro], ẹnyụn̄ ẹdọn̄ mme isụn̄utom ẹtiene enye ke edem, ẹte, Nnyịn iyomke owo emi akara nnyịn.” Mbio obio oro ẹdi nditọ Israel, m̀mê mme Jew, mme mbet esie isịneke. Ke Jesus ama akafiak ọnyọn̄ ke heaven, mme Jew ẹmi ke ndikọbọ mme mbet esie ẹma ẹnam ẹdiọn̄ọ ẹte ke mmimọ iyomke enye edi edidem mmimọ. Ke usụn̄ emi mmọ ẹkenam n̄kpọ nte mbio obio oro ẹkesiode mme isụn̄utom ẹdọn̄.

Didie ke ifụn duop oro ẹda okụk mmọ ẹnam n̄kpọ? Jesus anam an̄wan̄a ete: “Edikem ke enye ama ọkọbọ ubọn̄ oro ada, enye afiak edi, ọnọ uyo ete, ẹkot ikọt imọ oro imọ ikayakde okụk inọ mmọ, man ọfiọk udori eke mmọ ẹkekụtde ke mbubịne. Akpa owo edi edidọhọ enye ete, Ọbọn̄, okụk duop odoro ke iso-okụk fo. Ndien ọbọn̄ esie ọdọhọ enye ete, Omotịm anam, afo eti owo: sia afo akanamde akpanikọ ke ekpri n̄kpọ, di andikara obio duop. Udiana edi edidọhọ ete, Ọbọn̄, okụk ition odoro ke iso-okụk fo. Ndien ọbọn̄ esie ọdọhọ enye n̄ko ete, Afo nde di andikara obio ition.”

Ofụn oro enyenede okụk duop ada aban̄a otu mbet ọtọn̄ọde ke Pentecost eke 33 C.E. tutu idahaemi, oro ẹsịnede mme apostle. Ofụn oro ẹkenyenede okụk ition ke udori n̄ko ada aban̄a otu kiet okodude ke ukem iduọk ini oro, oro nte ekemde ye ifet ye ukeme mmọ, ẹkenamde inyene edidem mmọ ke isọn̄ ọtọt. Otu mbiba ẹmi ẹmekwọrọ eti mbụk ifịk ifịk, ndien nte utịp, ediwak mbon eti esịt ẹmekabade ẹdi mme Christian. Usụkkiet ke otu ifụn oro ẹnam mbubehe uforo uforo ẹnyụn̄ ẹnam se mmọ ẹkekamade ọtọt.

Jesus akaiso ete, “Owo en̄wen edi edidọhọ ete, Ọbọn̄, sese, okụk fo mi, emi n̄kọbọpde ke ọfọn̄ nnịm: koro mfefehe fi, koro afo edide owo nsọn̄ido: afo atatan̄ se mûkonịmke, onyụn̄ ọdọdọk se mûkọtọhọ. Ọbọn̄ ọdọhọ owo oro ete, Nyeda ikọinua fo n̄kpe ikpe nnọ fi, afo idiọkowo. Ama ọfiọk ete ndi owo nsọn̄ido, emi ntan̄de se mmen̄konịmke, nnyụn̄ ndọkde se mmen̄kọtọhọ; nsidi ndien ntak eke afo mûkemenke okụk mi usịn ke ubọk mme akama-okụk, man n̄kpọbọ iso-okụk ye udori ke mma nnyọn̄ ndi? Enye onyụn̄ ọdọhọ mmọemi ẹdade ẹkpere ete, Ẹbọ enye okụk oro, ẹmen ẹnọ enyeemi enyenede okụk duop.”

Kaban̄a idiọk ofụn oro, editaba ndamban̄a okụk oro ọwọrọ editaba itie ke Obio Ubọn̄ heaven. Ih, enye amataba ifet edikara, yak idọhọ, obio duop m̀mê obio ition. Tịmfiọk, ­n̄ko, ete ke owo idọhọke ite ke ofụn oro edi idiọkowo ke ­ntak ukwan̄n̄kpọ ekededi oro enye anamde edi, utu ke oro, ke ndikpu ndinam utom man inyene obio ubọn̄ eteufọk esie ọtọt.

Ke ini ẹyakde okụk idiọk ofụn oro ẹnọ akpa ofụn oro, ẹfan̄a ẹte: “Ọbọn̄, edi enyeemi enyene okụk duop.” Kpa ye oro, Jesus ọbọrọ ete: “Ẹyenọ kpukpru owo eke ẹnyenede; edi ẹyebọ enye eke mînyeneke kpa se enye enyenede. Edi ­amaedi mme asua mi ẹmi mîkoyomke ami n̄kara mmọ, ẹda mmọ ẹdi mi, ẹnyụn̄ ẹwot mmọ ke iso mi.” Luke 19:​11-27; Matthew 28:​19, 20.

▪ Nso inam Jesus otop n̄ke esie aban̄ade okụk?

▪ Anie edi ọbọn̄ oro, ndien idụt oro enye akade edi nso?

▪ Mmanie ẹdi ifụn oro, ndien okụk oro ẹda ẹban̄a nso?

▪ Mmanie ẹdi mbio obio oro, ndien didie ke mmọ ẹwụt usua mmọ?

▪ Ntak ẹkotde ofụn kiet idiọk ofụn, ndien editaba oro enye atabade okụk esie ọwọrọ nso?