Ibuot 104
Ẹmekop Uyo Abasi Ọyọhọ Utịm Ikata
KE ADAN̄AEMI odude ke temple, Jesus omokop akwa ubiak aban̄a n̄kpa oro enye edisobode ke mîbịghike. Se itịmde ibehe enye edi nte emi editụkde eti enyịn̄ Ete esie, ntre enye ọbọn̄ akam ete: “Ete, nọ enyịn̄ Fo ubọn̄.”
Do, ọkpọsọn̄ uyo oto ke heaven, ọdọhọ ete: “Mma n̄kọnọ enyịn̄ Mi ubọn̄, nyenyụn̄ ntọn̄ọ ntak nnọ enye ubọn̄.”
Otuowo ẹdade ẹkpere ẹdu ke n̄kpaidem. Ndusụk owo ẹtọn̄ọ nditịn̄ ẹte, “Angel eketịn̄ ikọ ye Enye.” Mmọ eken ẹte ke enyọn̄ atuak. Edi, ke akpanikọ, edi Jehovah Abasi eketịn̄ ikọ! Emi, nte ededi, idịghe akpa ini oro ẹkekopde uyo Abasi ke ebuana ye Jesus.
Ke baptism Jesus, isua ita ye ubak ke mbemiso, John Andinịm owo baptism ama okop nte Abasi etịn̄de ikọ aban̄a Jesus ete: “Emi edi edima Eyen Mi, emi esịt enemde Mi etieti ye Enye.” Ekem, ndusụk ini ke Passover enye eken ama ekebe, ke ini ẹkekpụhọrede mbiet Jesus ke iso mmọ, James, John, ye Peter ẹma ẹkop nte Abasi ọdọhọde ete: “Emi edi edima Eyen Mi, emi mmenem esịt ye Enye; ẹkop uyo Esie.” Ndien idahaemi, ọyọhọ utịm ikata, ke Nisan 10, usen inan̄ mbemiso n̄kpa Jesus, mme owo ẹtọn̄ọ ntak ẹkop uyo Abasi. Edi isan̄ enyeemi Jehovah etịn̄ man otuowo ẹkpekop!
Jesus anam an̄wan̄a ete: “Uyo oro ikedịghe kaban̄a Mi, edi ekedi kaban̄a mbufo.” Emi ọnọ uyarade nte ke Jesus ke akpanikọ edi Eyen Abasi, kpa Messiah oro ẹken̄wọn̄ọde. Jesus akaiso ete: “Ekem ini ikpe ererimbot emi: kemi ẹmọn̄ ẹdisio ọbọn̄ ererimbot emi ẹduọk.” Usụn̄uwem unam akpanikọ eke Jesus, nte utịp, ọsọn̄ọ nte ke Satan kpa Devil, andikara ererimbot emi odot se ‘ẹsiode ẹduọk,’ ẹsobode ẹfep.
Ke anyande ubọk owụt se idiwọrọde ito n̄kpa esie oro asan̄ade ekpere, Jesus ọdọhọ ete: “Ndien Ami, ke ẹma ẹmen Mi ẹkpọn̄ isọn̄, nyedụri kpukpru owo ẹtiene Mi.” N̄kpa esie idịghe edikpu ke usụn̄ baba kiet, koro otode n̄kpa esie, enye eyedụri mbon en̄wen ọnọ idemesie man mmọ ẹkpenyene nsinsi uwem.
Edi otuowo ẹneni ẹte: “Nnyịn ima ikop nte ẹdọhọde ke ibet, ẹte Christ eyesụk odu ke nsinsi: ndien Afo anam didie ọdọhọ ete, Ẹnyene ndimen Eyen Owo ke enyọn̄? Anie edi Eyen Owo emi?”
Kpa ye ofụri uyarade, esịnede edikop uyo Abasi, ekese owo isụk inịmke ke akpanikọ ite ke Jesus edi ata Eyen owo, kpa Messiah oro ẹken̄wọn̄ọde. Edi, kpa nte enye akanamde ke Usọrọ Mme Ataya ke ọfiọn̄ itiokiet ke edem edem, Jesus afiak etịn̄ aban̄a idemesie nte “un̄wana” onyụn̄ esịn udọn̄ ọnọ mme andikpan̄ utọn̄ nnọ enye ete: “Ke ini mbufo ẹnyenede un̄wana, ẹbuọt idem ye un̄wana, man mbufo ẹkabade ẹdi nditọ un̄wana.” Ke ama eketịn̄ ikọ ẹmi ama, Jesus aka okodịbe, nte an̄wan̄ade, koro uwem esie odude ke itiendịk.
Mme Jew nditre ndikọn̄ mbuọtidem ke idem Jesus osu ikọ Isaiah aban̄ade ‘mme owo ndibọp enyịn mmọ nnyụn̄ nnam esịt mmọ odobi mbak mmọ ẹdikabade esịt ndien ẹnam udọn̄ọ okụre mmọ.’ Isaiah ama okụt okụre ubọn̄ Jehovah eke heaven ke n̄kukụt, ye Jesus odude ekpere Jehovah ke ubọn̄ oro enye ekenyenede mbemiso edide owo. Kpa ye oro, mme Jew, ke ndisu se Isaiah ekewetde, ke nsọn̄ibuot ẹsịn uyarade oro nte ke Enyeemi edi Andinyan̄a mmimọ oro ẹken̄wọn̄ọde.
Ke n̄kan̄ eken, ediwak owo idem ke out mbọn̄ (nte an̄wan̄ade ẹdide mbon Sanhedrin, akwa esopikpe mme Jew) ẹbuọt idem ye Jesus. Nicodemus ye Joseph eke Arimathea ẹdi owo iba ke otu mbọn̄ ẹmi. Edi mbọn̄ ẹmi, kan̄a kemi, ẹkpu ndiwụt mbuọtidem mmọ an̄wan̄wa, mbak ẹdibịn mmọ ẹfep ke mme itie mmọ ke synagogue. Utọ mbon ẹmi ẹtaba ekese n̄kpọ didie ntem!
Jesus akaiso ọdọhọ ete: “Owo eke ọbuọtde idem ye Ami ibuọtke idem ye Ami [kpọt], edi ọbuọt ye Enyeemi ọkọdọn̄de Mi: . . . Ndien edieke owo ekededi okopde mme ikọ Mi, onyụn̄ etrede ndimụm mmọ n̄kama, Ami mbiereke ikpe nnọ enye: koro n̄kedịghe ndibiere ikpe nnọ ererimbot, edi n̄kedi ndinyan̄a ererimbot. . . . Ikọ eke n̄ketịn̄de, kpa ikọ oro edibiere ikpe ọnọ enye ke akpatre usen.”
Ima oro Jehovah amade ererimbot ubonowo akanam enye osio Jesus ọdọn̄ man akpanyan̄a mbon oro ẹbuọtde idem ye enye. Se ẹdidade ẹbiere m̀mê ẹmenyan̄a owo edi m̀mê mmọ ẹnam mme n̄kpọ oro Abasi eketemede Jesus nditịn̄. Ubiereikpe edida itie “ke akpatre usen,” ke Tọsịn Isua Ukara Christ.
Jesus ada ikọ esie osịm utịt ke ndidọhọ ete: “Koro Ami mmen̄ketịn̄ke n̄kpọ ke uyo Idem Mi; edi Ete emi ọkọdọn̄de Mi ke Idem Esie ọkọnọ Mi item aban̄a se n̄kpọdọhọde ye se n̄kpetịn̄de. Ndien mmọfiọk nte item Esie edi uwem nsinsi: mmọdo, mme n̄kpọ eke ntịn̄de, ntịn̄ kpa nte Ete ọkọnọde Mi uyo.” John 12:28-50; 19:38, 39; Matthew 3:17; 17:5; Isaiah 6:1, 8-10.
▪ Ke ewe idaha ita ke ẹkekop uyo Abasi ke ebuana ye Jesus?
▪ Didie ke prọfet Isaiah okokụt ubọn̄ Jesus?
▪ Mmanie ẹdi mbọn̄ ẹmi ẹbuọtde idem ye Jesus, edi ntak emi mmọ mînyịmeke enye an̄wan̄wa?
▪ Nso idi “akpatre usen,” ndien nso ke ẹdida ẹbiere ikpe ẹnọ mme owo adan̄aoro?