Ukpepn̄kpọ 9
Ana Mme Asan̄autom Abasi Ẹsana
Ntak anade nnyịn isana ke kpukpru usụn̄? (1)
Ọwọrọ nso ndisana ke n̄kan̄ eke spirit? (2) ndisana ke n̄kan̄ ido uwem? (3) ndisana ke n̄kan̄ ekikere? (4) ndisana ke n̄kan̄ ikpọkidem? (5)
Mme utọ ndedehe ikọinua ewe ke nnyịn ikpenyene ndifep? (6)
1. Jehovah Abasi asana. Enye odori enyịn ndikụt nte mme andituak ibuot nnọ enye ẹsanade—ke n̄kan̄ eke spirit, ido uwem, ekikere, ye ke ikpọkidem. (1 Peter 1:16) Oyom ata ukeme man ẹsana ke enyịn Abasi. Nnyịn idụn̄ ke ererimbot oro mîsanake. Nnyịn n̄ko inyene ndin̄wana mbiọn̄ọ mme ntụhọ oro nnyịn inyenede ndinam se idiọkde. Edi nnyịn inyeneke ndikpa mba.
2. Edisana Idaha eke Spirit: Edieke nnyịn iyomde ndinam n̄kpọ Jehovah, nnyịn inyeneke ndikaiso nsọn̄ọ nyịre ke mme ukpepn̄kpọ m̀mê mme ido edinam eke nsunsu ido ukpono ekededi. Ana nnyịn iwọrọ ikpọn̄ nsunsu ido ukpono ikûnyụn̄ inọ enye ibetedem ke usụn̄ ndomokiet. (2 Corinth 6:14-18; Ediyarade 18:4) Ndondo oro nnyịn idiọn̄ọde akpanikọ aban̄ade Abasi, ana nnyịn idu ke ukpeme mbak mme owo oro ẹkpepde ukwan̄ ukpepn̄kpọ ẹditụn nnyịn usụn̄.—2 John 10, 11.
3. Edisana Idaha eke Ido Uwem: Jehovah oyom mme andituak ibuot nnọ enye ẹnam n̄kpọ nte mme ata Christian kpukpru ini. (1 Peter 2:12) Enye okụt kpukpru n̄kpọ oro nnyịn inamde, idem se inamde ke ndịbe. (Mme Hebrew 4:13) Nnyịn ikpenyene ndifep oburobụt ido idan̄ ye ndedehe edinam eken eke ererimbot emi.—1 Corinth 6:9-11.
4. Edisana Idaha eke Ekikere: Edieke iyọhọde esịt nnyịn ye nti, ndisana ekikere, eduuwem nnyịn eyesana n̄ko. (Philippi 4:8) Edi edieke nnyịn iwụkde ntịn̄enyịn ke mme n̄kpọ oro mîsanake, enye eyesụn̄ọ ke ndiọi edinam. (Matthew 15:18-20) Nnyịn ikpenyene ndifep mme orụk unọ idem inemesịt ẹmi ẹkemede ndibiat ekikere nnyịn. Nnyịn imekeme ndiyọhọ esịt nnyịn ye nti ekikere ebe ke ndikpep Ikọ Abasi.
5. Edisana Idaha eke Ikpọkidem: Sia mmọ ẹdade ke ibuot Abasi, mme Christian ẹkpenyene ndinam idem ye edisịnen̄kpọ mmọ ẹsana. Nnyịn ikpenyene ndiyet ubọk nnyịn ke iwọrọde ke itie ukaikọt, ikponyụn̄ inyene ndiyet mmọ mbemiso idiade udia m̀mê inamde udia. Edieke afo mûnyeneke eti ndutịm uda mmọn̄ esan̄ukwak nyet ifuọ, ekpenyene nditịbi isọn̄ mfụk ifuọ. (Deuteronomy 23:12, 13) Ndisana ke n̄kan̄ ikpọkidem otịp esịn ke eti nsọn̄idem. Ufọk Christian ekpenyene ndiye nnyụn̄ nsana ke esịt ye an̄wa. Enye ekpenyene ndiwọrọ nda ke n̄kann̄kụk nte eti uwụtn̄kpọ.
6. Edisana Ikọinua: Mme asan̄autom Abasi ẹnyene nditịn̄ akpanikọ kpukpru ini. Mme osu nsu ididụkke Obio Ubọn̄ Abasi. (Ephesus 4:25; Ediyarade 21:8) Mme Christian isitịn̄ke ndedehe ikọ. Mmọ isikpan̄ke utọn̄ inọ m̀mê nditịn̄ ikọ idiọk mbubru m̀mê ndibụk ndedehe mbụk. Ke ntak edisana ikọinua mmọ, mmọ ẹsiwọrọ ẹda isio isio ke itieutom m̀mê ke ufọkn̄wed ye ke mbọhọ.—Ephesus 4:29, 31; 5:3.
[Mme ndise ke page 18, 19]
Ana mme asan̄autom Abasi ẹsana ke kpukpru nde