Ukpepn̄kpọ 16

Ubiere Fo Ndinam N̄kpọ Abasi

Ana afo anam nso man akabade edi ufan Abasi? (1, 2)

Didie ke afo anam uyakidem emi afo ayakde ọnọ Abasi? (1)

Ini ewe ke afo ekpenyene ndina baptism? (2)

Didie ke afo ekeme ndinyene odudu man akaiso anam akpanikọ ọnọ Abasi? (3)

1. Man akabade edi ufan Abasi, ana afo enyene ọyọhọ ifiọk oro aban̄ade akpanikọ Bible (1 Timothy 2:​3, 4), ọkọn̄ mbuọtidem ke mme n̄kpọ oro afo ekpepde (Mme Hebrew 11:⁠6), akabade esịt ọkpọn̄ mme idiọkn̄kpọ fo (Utom 17:​30, 31), onyụn̄ ọwọn̄ọde ọkpọn̄ usụn̄uwem fo. (Utom 3:19) Ekem ima oro afo amade Abasi ekpenyene ndinụk fi ndiyak idemfo nnọ enye. Emi ọwọrọ ke ọkpọkpọ akam idemfo oro ọbọn̄de afo asian enye ete ke imọ imayak idem imọ inọ enye man inam uduak esie.​—⁠Matthew 16:24; 22:37.

2. Ke ama akayararede uyakidem fo ọnọ Abasi, afo ekpenyene ndina baptism. (Matthew 28:​19, 20) Baptism anam kpukpru owo ẹdiọn̄ọ ẹte ke afo ama ayak idemfo ọnọ Jehovah. Ntre baptism enyene sụk mbon oro ẹkponde ẹsịm idaha oro ẹkemede ndibiere ndinam n̄kpọ Abasi. Ke ini owo anade baptism, ẹkpenyene ndisịn ofụri idemesie ke esịt mmọn̄ ke ibio ini.a​—⁠Mark 1:​9, 10; Utom 8:⁠36.

3. Ke afo ama akanam uyakidem, Jehovah eyedori enyịn ndikụt nte afo odude uwem ekekem ye un̄wọn̄ọ fo. (Psalm 50:14; Ecclesiastes 5:​4, 5) Devil eyedomo ndinam fi etre ndinam n̄kpọ Jehovah. (1 Peter 5:⁠8) Edi san̄a kpere Abasi ke akam. (Philippi 4:​6, 7) Kpep Ikọ esie ke usen kiet kiet. (Psalm 1:​1-3) Diana ye esop. (Mme Hebrew 13:17) Ebede ke ndinam ofụri emi, afo eyenyene odudu ndinam akpanikọ nnọ Abasi. Ke nsinsi nsinsi afo ke ntem emekeme ndinam mme n̄kpọ oro Abasi oyomde oto fi!

[Ikọ idakisọn̄]