Ufiopesịt

UFIOPESỊT an̄wam ndisịn uwem ke utịn̄ikọ. Ke adan̄aemi ọfọnde ndinyene mme ntọt oro ẹsịnede ifiọk, se idimụmde ntịn̄enyịn otuowo edi ufiop ufiop utịn̄ikọ oro enyenede uwem. Inamke n̄kpọ m̀mê afo oto ewe ekpụk m̀mê nso idi edu fo, afo emekeme ndikọri ufiopesịt.

Tịn̄ Ikọ ye Ntụk. Ke ini eketịn̄de ikọ ọnọ n̄wan Samaria, Jesus ọkọdọhọ ete ke mbon oro ẹtuakde ibuot ẹnọ Jehovah ẹnyene ndinam ntre “ke spirit ye ke akpanikọ.” (John 4:24) Ana utuakibuot mmọ edi ke ntak esịtekọm onyụn̄ enyene ndidu ke n̄kemuyo ye akpanikọ oro odude ke Ikọ Abasi. Ke ini owo enyenede utọ ntotụn̄ọ esịtekọm oro, emi oyowụt idem ke usụn̄ emi enye etịn̄de ikọ. Enye eyenyene udọn̄ nditịn̄ nnọ mbon efen mban̄a mme ima ima ndutịm Jehovah. Nte enye enịmde iso, nte enye adade idem etịn̄ ikọ, ye uyo esie ẹyewụt nte enen̄erede etie enye ke idem.

Nso idi ntak emi etịn̄ikọ oro amade Jehovah onyụn̄ enịmde se enye etịn̄de ke akpanikọ ekpetrede ndinyene ufiopesịt ke ini etịn̄de ikọ? Ikụreke ke enye nditịm se enye editịn̄de. Ana enye esịn esịt ke ibuot nneme esie, abuan ntụk esie. Yak idọhọ ke ẹnọ enye utịn̄ikọ aban̄ade uwa ufak Jesus Christ. Ke ini etịn̄ikọ ọnọde utịn̄ikọ esie, mme ekikere oro enye etịn̄de inyeneke ndiyọhọ ye ntọt kpọt, edi ye esịtekọm ke se uwa Jesus ọwọrọde ọnọ etịn̄ikọ ke idemesie ye otuowo esie. Enye enyene nditi esịtekọm oro enye enyenede ọnọ Jehovah Abasi ye Christ Jesus kaban̄a utịbe utịbe ndutịm emi. Enye enyene ndikere mban̄a akwa idotenyịn uwem emi uwa ufak oro ebererede ọnọ ubonowo—nsinsi inemesịt ye mfọnmma nsọn̄idem ke paradise isọn̄ oro ẹfiakde ẹwụk! Ntem, oyom enye esịn esịt esie.

Kaban̄a ewetn̄wed oro Ezra, emi ekedide andikpep ke Israel, Bible ọdọhọ ete ke enye “[ama etịm, NW] esịt esie ndidụn̄ọ n̄wed ibet Jehovah, nnyụn̄ nnam, nnyụn̄ nteme ewụhọ ye ikpe ke Israel.” (Ezra 7:10) Edieke nnyịn inamde kpasụk ntre—mîtịmke sụk mme ntọt, edi itịmde esịt nnyịn n̄ko—ikọ nnyịn edito esịt. Utọ ikọ akpanikọ oro otode esịt do ekeme nditịm n̄n̄wam mbon oro nnyịn itịn̄de ikọ inọ ndikọri ata ima nnọ akpanikọ.

Kere Ban̄a Otuowo Fo. Akpan n̄kpọ efen ke ndiwụt ufiopesịt edi ndinịm nte ke oyom otuowo fo okop se afo enyenede nditịn̄. Emi ọwọrọ ete ke ini etịmde utịn̄ikọ fo, afo ukpunyeneke nditịm sụk ntọt oro odotde, edi n̄ko ekpenyene ndibọn̄ akam nnọ Jehovah nyom ndausụn̄ esie man ada enye an̄wam mbon oro afo editịn̄de ikọ ọnọ. (Ps. 32:8; Matt. 7:7, 8) Dụn̄ọde ntak emi oyomde otuowo fo okop ntọt oro, nte enye edin̄wamde mmọ, ye nte afo ekemede nditịn̄ enye ke utọ usụn̄ oro mmọ ẹdikụtde ufọn esie.

Ka iso tịm utịn̄ikọ fo tutu afo enyene se inọde fi nduaidem. Enye inyeneke ndidi obufa ibuotikọ, edi usụn̄ emi afo adade eneme enye ekeme ndidi obufa. Edieke afo etịmde n̄kpọ oro editịmde in̄wam otuowo fo ndisọn̄ọ itie ebuana mmọ ye Jehovah, ndiwụt esịtekọm nnọ mme ndutịm esie, ndikụt unen ke ndiyọ mme mfịghe uwem ke akani editịm n̄kpọ emi, m̀mê ndinyene uforo ke utom ukwọrọikọ mmọ, do afo emenyene ediwak ntak ndikop nduaidem mban̄a utịn̄ikọ fo.

Nso edieke utịn̄ikọ fo edide edikot n̄wed nnọ otuowo? Man anam emi ye ufiopesịt, oyom se ikande edikeme ndikot mme ikọ enen nnyụn̄ mbon mmọ ọtọkiet nte odotde. Kpep n̄wed utịn̄ikọ oro. Edieke afo oyomde ndikot itie ke Bible, nam ndusụk ndụn̄ọde ban̄a enye. Kụt ete ke emetịm ọfiọk se enye ọwọrọde. Kere ban̄a nte enye enyenede ufọn ọnọ fi ye otuowo fo, nyụn̄ kot ye udọn̄ ndinam mbon oro ẹkpan̄de utọn̄ ẹnọ fi ẹdiọn̄ọ oro.

Nte afo etịm idem ọnọ an̄wautom? Fiak dụn̄ọde ibuot nneme fo ye mme itie N̄wed Abasi oro afo odiomide ndikot. Kere n̄ko ban̄a se idude ke esịt mme owo. Nso ke ẹtịn̄ ke mbụk n̄kpọntịbe? Nso mfịna ke mmọ ẹsobo? Ke ini afo etịmde idem ndiwụt mme owo nte ke Ikọ Abasi enyene usọbọ ọnọ mme mfịna oro mmọ ẹkam ẹsobode, afo eyenyene ọkpọsọn̄ udọn̄ ndinam oro, onyụn̄ enyene ufiopesịt ke ndammana usụn̄.

Wụt Ufiopesịt ebe ke Ndinọ Utịn̄ikọ Ufiop Ufiop. Ufiopesịt edinen̄ede owụt idem ke ufiop oro utịn̄ikọ fo enyenede. Ẹkpenyene ndikụt emi ke nte afo enịmde iso. Ana afo owụt nte ke imenịm se imọ itịn̄de ke akpanikọ, idịghe nditie eto eto.

Oyom ada ukem ukem. Ndusụk owo ẹkeme ndinyene ntụhọ edikop nduaidem mban̄a kpukpru n̄kpọ. Ekeme ndiyom ẹn̄wam mmọ ndikụt nte ke ini owo etịn̄de ikọ nneminua nneminua m̀mê nduaidem nduaidem akaha, otuowo esie edikere iban̄a enye utu ke ndikere mban̄a etop oro. Ke n̄kan̄ eken, oyom ẹsịn udọn̄ ẹnọ mbon o-bụt nditịn̄ ikọ uyo ọwọrọ.

Ufiopesịt esibe-be owo. Edieke afo etịmde ese otuowo onyụn̄ enyenede ufiopesịt ke utịn̄ikọ fo, otuowo fo eyenyene ukem ufiopesịt oro. Apollos ama esisịn uwem ke utịn̄ikọ esie, ndien ẹkekot enye owo udọnikọ. Edieke afo enyenede ufiopesịt ke spirit Abasi, ufiop ufiop utịn̄ikọ fo oyonụk mbon oro ẹkpan̄de utọn̄ ẹnọ fi ndinam n̄kpọ.—Utom 18:24, 25; Rome 12:11.

Ufiopesịt Odot ye Utịn̄ikọ. Kpeme mbak udunam ufiopesịt fo ọdọdọk akaha ke ofụri utịn̄ikọ fo tutu enye akabade efek otuowo fo. Item ekededi oro afo edinọde man ẹda ẹnam n̄kpọ edidi ediduọn̄ọ inụn̄ ke nsia ebiọn̄. Emi ọsọn̄ọ owụt ufọn editịm utịn̄ikọ ke usụn̄ oro ediyakde esịn mme nsio nsio ndunịm ke ini ọnọde. Domo nditre ndiwụt unana udọn̄. Edieke afo emekde se edisịnde ke utịn̄ikọ fo ye ntịn̄enyịn, afo eyenyene ntotụn̄ọ udọn̄ ke enye. Edi nte ido edide ndusụk akpan n̄kpọ ẹsiyom ufiopesịt ẹkan mbon efen ke ini ọnọde utịn̄ikọ, ndien ekpenyene ndida mbufiọk mbuan mmọ ke ofụri utịn̄ikọ fo.

Ekpenyene ndida ufiopesịt nnen̄ede ntịn̄ mme akpan n̄kpọ. Ana utịn̄ikọ fo enyene mme ọkpọikọ, kpa mme nsụk ikọ emi ọbọpde utịn̄ikọ fo odori. Sia mmọ ẹdide mme akpan ikpehe ke utịn̄ikọ fo, mmọ ẹyewak ndidi mme akpan n̄kpọ oro etịmde man ada edemede udọn̄ otuowo fo. Ke ama akanam otuowo fo enịm se etịn̄de ke akpanikọ, afo enyene ndidemede mmọ udọn̄, ndiwụt mmọ ufọn edida se ẹnemede nsịn ke edinam. Ufiopesịt ayan̄wam fi ndisịm esịt mme andikpan̄ utọn̄ nnọ fi. Owo ikpenyeneke ndinọ ufiop ufiop utịn̄ikọ odudu odudu. Ntak ẹyomde enye ekpenyene ndidu, ndien utịn̄ikọ fo ekpenyene ndinọ fi ntak oro.