UKPEPN̄KPỌ 10

Yak Uyo Fo Ekem ye Se Etịn̄de

Mme N̄ke 8:4, 7

SE AKPANAMDE: Yak nte enịmde uyo etịn̄ ikọ ekekem ye se afo etịn̄de aban̄a. Menede nyụn̄ sụhọde uyo ke ebiet emi oyomde anam ntre. Sọp inua mîdịghe tịn̄ ikọ sụn̄sụn̄ ke ebiet emi oyomde anam ntre.

NTE AKPANAMDE:

Menede nyụn̄ sụhọde uyo. Menede uyo ke ini oyomde nditịn̄ akpan n̄kpọ ye ke ini oyomde mme owo ẹnam se afo etịn̄de. Nam ntre n̄ko ke ini okotde etop ubiomikpe ke Bible. Sụhọde uyo ke ini etịn̄de n̄kpọ emi anamde owo mbọm, m̀mê n̄kpọ emi anamde owo ndịk, m̀mê ke ini oyomde mme owo ẹkere m̀mê nso iyom nditịbe idahaoro.

Kûmenede uyo ndien ndien man mme owo idikere ke ọtọtọhọ m̀mê ke adaduat mmimọ. Kûnyụn̄ unam uyo nte mbon drama m̀mê nte mme ẹbre kọnsat man iditie nte oyom ndinam mme owo ẹsak.
Kpụhọ uyo. Kpụhọ uyo ke ini oyomde nditịn̄ nte n̄kpọ enemde, nte n̄kpọ okponde, m̀mê nte usụn̄ ọniọn̄de eketre. Kpụhọ uyo nyụn̄ tịn̄ ikọ sụn̄sụn̄ ke ini etịn̄de n̄kpọ emi etiede mbọm mbọm.
Tịn̄ ikọ sọp inua ndusụk ini. Tịn̄ ikọ sọp inua ke ini oyomde nditịn̄ nte n̄kpọ ekenemde. Edi kûsọsọp inua ke ini oyomde nditịn̄ akpan n̄kpo.

Emekeme nditịmede otuowo edieke edide ke etịn̄ ikọ aka, afo ọtọn̄ọ ndisọp inua inikiet inikiet nte owo ebịne fi. Ti n̄ko ke edieke ọsọpde inua akaha, mme owo idikopke kpukpru se etịn̄de.