UKPEPN̄KPỌ 14

Nam Akpan N̄kpọ Ọwọrọ Ada

Mme Hebrew 8:1

SE AKPANAMDE: Nam se afo etịn̄de an̄wan̄a owo, nyụn̄ nam mmọ ẹkụt akpan n̄kpọ emi afo oyomde mmọ ẹkpep ye se oyomde mmọ ẹda ẹnyọn̄.

Diọn̄ọ se afo oyomde mme owo ẹda ẹnyọn̄. Ke ini etịmde utịn̄ikọ fo, tie kere se afo oyomde mme owo ẹda ẹnyọn̄. Ndi oyom ndinam mmọ ẹfiọk se iketịbede, m̀mê ẹfiọk se ẹkpenamde, mîdịghe oyom mmọ ẹnịm se Bible etịn̄de? Ntre, yak nte etịn̄de ikọ owụt mmọ se afo oyomde mmọ ẹda ẹnyọn̄.

Kere ise. ‘Nso utọ mbụme ke mme owo ẹkpema ndibụp mban̄a se afo etịn̄de? Ewe mbụme ke mmọ ẹkpebem iso ẹbụp ndien ewe ekpetiene?’ Ke ama ọkọdiọn̄ọ emi, bụp mme mbụme oro nte mmọ ẹkpebụpde nyụn̄ bọrọ enye ke adiana ke adiana man ikọ fo ọsọp an̄wan̄a mmọ, onyụn̄ anam mmọ ẹnịm se etịn̄de.
Nam mme owo ẹfiọk se afo oyomde mmọ ẹkpep. Tịn̄ mme akpan n̄kpọ emi afo oyomde mme owo ẹkpep ke ini ke ini. Emekeme nditịn̄ enye ke nsio nsio usụn̄ man enen̄ede an̄wan̄a owo.
Yak ikọ fo an̄wan̄a kpukpru owo. Tịn̄ ikọ emi edinamde akpan n̄kpọ emi oyomde mme owo ẹkpep ọwọrọ ada. Kûtịn̄ ikọ awawak man ududia ini, edi tịn̄ akpan n̄kpọ ifan̄ emi ọdiọn̄ọde ke afo emekeme ndinam etịm an̄wan̄a owo. Ama etịn̄ akpan n̄kpọ kiet ama, bet esisịt mbemiso ebede aka en̄wen.

Emekeme nditịn̄ mme akpan n̄kpọ emi afo ediyomde mme owo ẹda ẹnyọn̄ ke ntọn̄ọikọ fo man mmọ ẹkpenen̄ede ẹkpan̄ utọn̄, mîdịghe etịn̄ enye ke utịtikọ fo man mmọ idisọp ifre.