“Kpukpru Mme Andidu ke Udi”

NTE afo omonịm ke akpanikọ ke ediwak mme akpan̄kpa ẹyefiak ẹdu uwem? Ih, sia Jesus ọkọdọhọde ete: “Ẹkûyịk n̄kpọ emi, koro ini ke edi emi kpukpru mmọ oro ẹdude ke udi editi ẹdikopde enye uyo ẹwọn̄ọ ẹdi.” (John 5:28, 29, NW) Tịmfiọk ikọ oro “udi editi,” emi edide n̄wọrọnda ke New World Translation. Enye eti nnyịn nte ibuot uti-n̄kpọ Abasi edide akpan n̄kpọ ke ediset ke n̄kpa.

Ntak emi owo mîdaha, “udi,” emi ẹsiwak de ndida-a? Sia Jesus mîkadaha ikọ Greek oro, taʹphos, emi adade ọnọ ediwak n̄kpọ, emi ọwọrọde “udi” m̀mê “itie ubụk owo.” Ke akpanikọ, idịghe kpukpru mbon oro ẹkekpan̄ade ke ẹkebụk ke ata udi, m̀mê taʹphoi. Edi, mbon oro Abasi edifiakde ada edi ke ediset ke n̄kpa ẹdu ke ibuot uti-n̄kpọ esie. Ẹwụt emi ke Jesus ndida ikọ oro, mne·meiʹon, emi adade ọnọ ediwak n̄kpọ, oro enen̄erede enyene ebuana ye mme ikọ Greek ẹmi ke ata idem n̄kpọ ẹwọrọde “nditi.” (Matthew 16:9; Mark 8:18) Greek-English Lexicon oro H. G. Liddell ye R. Scott ẹwetde akabade mne·meiʹon nte “eke etide, edifiak nti, n̄wetnnịm n̄kpọ aban̄ade owo m̀mê n̄kpọ, . . . udi, . . . ke ofụri ofụri, n̄kpọ editi.”

Ntre, New World Translation owụt ukpụhọde oro odude ke ufọt taʹphos ye mne·meiʹon. Odot ẹtịm ẹfiọk n̄ko nte ke ediwak edikabade Bible ke ukem usụn̄ oro ẹda nsio nsio ikọ iba ke Matthew 23:29 ke ebiet ikọ Greek mbiba ẹmi ẹdude. Revised Standard Version akabade mmọ nte ẹtienede mi: “Mbufo ẹbot udi [uduot taʹphos] mme prọfet ẹnyụn̄ ẹdiọn̄ itiat editi [uduot mne·meiʹon] ndinen owo.”

Andibot owo ifreke mme uduot uwem ediwak million owo ke itie tọsịn ẹmi ẹkedude uwem. (Psalm 139:16; 147:4; Matthew 10:30) Ke edikem ini esie, enye eyeti mbon oro ẹdude ke “udi editi” onyụn̄ afiak ọnọ mmọ uwem ke ererimbot oro ẹnamde asana. Nnyịn inyene nsịnudọn̄ inyụn̄ ikop ndọn̄esịt didie ntem ndidiọn̄ọ ke mfọnmma ibuot uti-n̄kpọ Abasi ikemeke ndikpu!​—Ediyarade 20:11-13.