Uwem ye Utom Jesus

Ọkpọsọn̄ Mfụhọ ke In̄wan̄

KE Jesus ọbọn̄de akam okụre, enye ye mme anam-akpanikọ apostle 11 esie ẹkwọ ikwọ itoro ẹnọ Jehovah. Ekem mmọ ẹsụhọde ke ubet enyọn̄, ẹwọrọ ẹdụk mbịtmbịt ekịm okoneyo, ẹnyụn̄ ẹsan̄a ke itịghede Kidron ẹbe ẹka Bethany. Edi ke usụn̄, mmọ ẹtuak ẹda ke ediye ebiet kiet, kpa in̄wan̄ Gethsemane. Ebiet emi odu mîdịghe ekpere Obot Olive. Jesus esiwak ndisobo ye mme apostle esie ke idak eto olive ẹmi.

Ke ọkpọn̄de apostle itiaita​—iso-ọfọn ekperede inuaotop in̄wan̄ oro​—enye eteme mmọ ete: “Mbufo ẹtie mi, tutu n̄ka ko n̄kọbọn̄ akam.” Enye ndien ada owo ita eken​—Peter, James, ye John​—onyụn̄ ebe odụk esịt in̄wan̄ oro. Jesus ofụhọ onyụn̄ odu ke ọkpọsọn̄ nnanenyịn. Enye ọdọhọ mmọ ete, “Ukpọn̄ Mi ofụhọ etieti ekpere ndikpa; mbufo ẹtie mi, ẹkpeme ye Ami.”

Ke asan̄ade esisịt akaiso, Jesus ọduọ ke isọn̄ onyụn̄ okụbi iso ke isọn̄ ọtọn̄ọ ndibọn̄ akam ifịk ifịk ete: “O Ete Mi, edieke usụn̄ odude, yak cup emi ebe ọkpọn̄ Mi; edi yak okûdi nte Ami nnyịmede; edi yak edi nte Afo onyịmede.” Nso ke ikọ esie ọwọrọ? Ntak emi enye “ofụhọ[de] etieti ekpere ndikpa”? Nte enye oyom ndikpọn̄ ubiere oro enye ebierede ndikpa man ọnọ ufak?

Ke baba usụn̄ kiet? Jesus iben̄eke ite ẹnyan̄a imọ ẹsio ke n̄kpa. Idem ekikere editre ndikpa n̄kpa uwa, emi Peter inikiet ọkọnọde ekikere aban̄a, edi n̄kpọ itekesịt ọnọ enye. Utu ke oro, enye odu ke ọkpọsọn̄ mfụhọ ke ntak emi enye okopde ndịk nte ke usụn̄ emi imọ idikpade ke mîbịghike​—nte idiọk abiatibet​—eyeda esuene ọsọk enyịn̄ Ete imọ. Enye idahaemi ọmọfiọk ete ke hour ifan̄ ẹyekọn̄ imọ ke eto nte ata idiọkowo​—kpa andisụn̄i Abasi! Se inamde enye odu ke ọkpọsọn̄ nnanenyịn edi emi.

Ke ama ọkọbọn̄ akam ke anyanini, Jesus afiak edi onyụn̄ okụt apostle ita ẹmi ẹdede idap. Ke etịn̄de ikọ ye Peter, enye ọdọhọ ete: “Nso idi emi? Nte mbufo ikemeke nditiene Mi n̄kpeme ke hour kiet? Ekpeme, ẹnyụn̄ ẹbọn̄ akam, mbak mbufo ẹdidụk ke idomo.” Nte ededi, ke ọfiọkde aban̄a mfịghe oro efịghede mmọ ye nte eyo ọsọn̄de, enye ọdọhọ ete: “Ukpọn̄ ọsọp ke akpanikọ, edi obụkidem edi mmemmem.”

Jesus ndien ọtọn̄ọ ntak aka ọyọhọ utịm ikaba onyụn̄ eben̄e ete Abasi emen “cup emi” ọkpọn̄ imọ, oro edi, ikpehe utom m̀mê uduak oro Jehovah aduakde ọnọ imọ. Ke ini enye afiakde edi, enye ọtọn̄ọ ntak okụt nte owo ita ẹmi ẹdede idap ke ini akpanade mmọ ẹbọn̄ akam ẹben̄e ẹte mmimọ ikûdụk ke idomo. Ke ini Jesus etịn̄de ikọ ye mmọ, mmọ ifiọkke se ẹkpebọrọde.

Ke akpatre, ke ọyọhọ utịm ikata, Jesus asan̄a ke n̄kpọ nte ubọk iyịrọ kiet, onyụn̄ ọtọn̄ọ edọn̄ ndien ye ọkpọsọn̄ eseme ye mmọn̄eyet, enye ọbọn̄ akam ete: “Ete, edieke Afo onyịmede, men Mi cup emi fep.” Jesus enen̄ede okop ọkpọsọn̄ ubiak ke ntak esuene oro n̄kpa esie nte abiatibet edidade ọsọk enyịn̄ Ete esie. Kamse, ndidi se ẹdoride ikọ nte osụn̄i isụn̄i​—owo emi osụn̄ide Abasi​—ọsọn̄ akaha ndidi se ọyọde.

Edi, Jesus akaiso ọbọn̄ akam ete: “Okûdi nte Ami nnyịmede, edi nte Afo onyịmede.” Jesus ke nsụkibuot ayak uduak esie edi uduak Abasi. Ye emi, angel oto heaven ọbiọn̄ọde onyụn̄ ada ndusụk ikọ nsịnudọn̄ ọsọn̄ọ enye idem. Iso-ọfọn, angel emi asian Jesus ete ke enye enyene unyịme Ete esie.

Edi, nso mbiomo idoro Jesus ntem ke afara! Nsinsi uwem esie ye eke ofụri ekpụk ubonowo odu ke udomo. Ọkpọsọn̄ mfụhọ emi okpon etieti. Ntre Jesus akaiso ndibọn̄ akam ifịk ifịk, ibibiak esie onyụn̄ ebiet mme ntọi iyịp nte mmọ ẹtọide ke isọn̄. The Journal of the American Medical Associaiion ọdọhọ ete, “Okposụkedi emi edide ata n̄kpọntịbe emi mîsiwakke nditịbe, ibibiak emi etiede iyịp iyịp . . . ekeme ndisiaha owo ke mme idaha ata editịmede esịt.”

Ke oro ebede, Jesus afiak ọyọhọ utịm ikata ebịne mme apostle esie, ndien inikiet efen okụt mmọ ẹdede idap. Mmọ ẹkop mmemidem ke ntak ọkpọsọn̄ mfụhọ. Enye ofiori ete, “Ẹdọdiọn̄ ẹde idap ndien, ẹnyụn̄ ẹda nduọkodudu. Ekem adan̄aoro; ini oro ama edi; ẹma ẹda Eyen Owo ẹsịn mme idiọkowo ke ubọk. Ẹdaha ke enyọn̄, nnyịn inyọn̄. Sese, owo eke adade Mi ọnọ ke ekpere.”

Ke adan̄aemi enye osụk etịn̄de ntem, Judas Iscariot ọbiọn̄ọde, otuowo ẹmi ẹkamade nsaran̄ikan̄ ye utuenikan̄ ye n̄kpọ en̄wan ẹsan̄a ye enye. Matthew 26:30, 36-47; 16:21-23; Mark 14:26, 32-43; Luke 22:39-47; John 18:1-3; Mme Hebrew 5:7.

◆ Ke ẹkpọn̄de ubet enyọn̄, Jesus ada mme apostle aka m̀mọ̀n̄, ndien nso ke enye anam do?

◆ Ke adan̄aemi Jesus ọbọn̄de akam, nso ke mme apostle ẹnam?

◆ Ntak emi Jesus odude ke ọkpọsọn̄ mfụhọ, ndien nso ke enye eben̄e Abasi?

◆ Ibibiak Jesus ndibiet mme ntọi iyịp owụt nso?