Uwem ye Utom Jesus

“Se Enye Owo Oro Do”

KE EDU Jesus otụkde enye ke idem, onyụn̄ ọfiọkde ke enye iduehe, Pilate oyom usụn̄ efen ndisana enye nyak. Enye asian otuowo ete, “Mbufo ẹmenyene ido, ẹte nsana owo kiet nyak nnọ mbufo ke passover.”

Ẹmụm Barabbas n̄ko, kpa ọwọrọetop owotowo, nte owo n̄kpọkọbi, ntre Pilate obụp ete: “Mbufo ẹyom ẹte nsana anie nyak nnọ mbufo? M̀mê Barabbas, m̀mê Jesus emi ẹkotde Christ?”

Ke ikpọ oku ẹmi edemerede mmọ ẹkpekde, mme owo oro ẹben̄e ẹte ẹsana Barabbas ẹyak edi ẹwot Jesus. Ke mîyakke idem emem, Pilate ọbọrọ, afiakde obụp ete: “Mbufo ẹyom nsana anie ke otu owo iba ẹmi nyak nnọ mbufo?”

Mmọ ẹfiori ẹte, “Barabbas.”

Pilate ke mfụhọ obụp ete, “Nnam ndien didie ye Jesus emi ẹkotde Christ?”

Ye inan inan uyo mfiori kiet, mmọ ẹbọrọ ẹte, “Wot enye ke eto!” (NW) “Wot, wot enye.”

Ke ọfiọkde ete ke mmọ ẹyom ẹwot owo oro mîduehe, Pilate ekpe ubọk ete: “Ntak-a? Owo emi akanam nso idiọk? N̄kwe baba n̄kpọ kiet emi odotde n̄kpa ke Enye: ntre nyemia Enye, nsana Enye nyak.”

Kpa ye ukeme esie, anana-iwụk otuowo, ẹmi mme adaiso ido ukpono ẹsịnde nsọk, ẹkaiso ẹfiori ẹte: “Ẹwot enye ke eto!” (NW) Ke mme oku ẹnamde mmọ ẹdama, otuowo ẹyom iyịp. Ke ekerede, ke usen ition kpọt ke mbemiso, eyedi ndusụk mmọ ẹma ẹdu ke otu mbon oro ẹkedarade Jesus ke Jerusalem nte Edidem! Ye kpukpru ẹmi, mbet Jesus, edieke edide mmọ ẹdu do, isioroke uyo inyụn̄ isioho idem iwụt.

Pilate, ke okụtde ke n̄kpeubọk imọ inyeneke ufọn, edi, utu ke oro, nte ke ndutịme osụk ọsọsọn̄, ada mmọn̄ eyet ubọk esie ke iso otuowo, onyụn̄ ọdọhọ ete: “Nsan̄ake n̄kpọ ye iyịp eti owo emi: mbubehe mbufo edi oro.” Ke oro mme owo ẹbọrọ ẹte: “Iyịp Esie akpakam ọkọbọ nnyịn ye nditọ nnyịn.”

Ntre, man ekekem ye eben̄e mmọ—onyụn̄ aduakde ndinem otuowo esịt akan ndinam se enye ọfiọkde ke enen—Pilate asana Barabbas ayak ọnọ mmọ. Enye ada Jesus onyụn̄ anam ẹkpọk enye edisịnen̄kpọ ke idem ndien ekem ẹmia enye. Emi ikedịghe ikpîkpu imia. The Journal of the American Medical Association anam an̄wan̄a ido umia owo mbon Rome ete:

“Se ẹkesikamade nte ido edide ekesidi ibio ikpa emi ẹfụkde ikpaunam oro enyenede ediwak, nsio nsio udomo ekpụk ke nsio nsio itie m̀mê oro ẹdọkde-dọk eyịri kiet, emi ẹkesitebede n̄kpri ekara ukwak ye mbai ọkpọ erọn̄ ke nsio nsio itie. . . . Nte mbonekọn̄ Rome ẹkesimiade edem owo oro ẹmụmde ẹfiak ẹmia ke ofụri odudu, mme ekara ukwak oro ẹyenịm enye nde ke idem, ndien mme ekpụk ikpaunam oro ye mme ọkpọ erọn̄ ẹyesiak ikpaidem ye obụkidem. Ekem, nte imia emi akade iso, mme nde unan emi ẹyetotịm ẹsiaha ẹdụk esịtidem ẹnyụn̄ ẹnịm nde ke idem oro iyịp ọwọrọde.”

Ke ndutụhọ ndutụhọ imia emi ebede, ẹda Jesus ẹka esịt okụre andikara, ndien ẹkot ofụri mbonekọn̄ ẹbon ọtọkiet. Do mbonekọn̄ ẹnọ enye esuene efen efen ke ndidọk anyanya n̄kukịm nyari enye ke ibuot. Mmọ ẹfak enye esan̄ ke ubọk nnasia, ẹnyụn̄ ẹsịne enye ididuot ekụra, kpa utọ oro mbọn̄ ẹsisịnede. Ndien mmọ ẹsak enye nsahi ẹte: “Etia! Edidem mme Jew!” N̄ko, mmọ ẹkọk etap ẹtọ enye ẹnyụn̄ ẹmia enye ufia ke iso. Ke ẹwamarede esan̄ oro ẹbọ enye ke ubọk, mmọ ẹda esan̄ oro ẹyịbi enye ke ibuot, idem ẹkade-kaiso ẹfịk nsọsọp iso n̄kukịm “anyanya” esuene esie oro ẹdọn̄ enye ke ikpaibuot.

N̄wọrọnda uku ye odudu oro Jesus enyenede ke ẹnamde enye n̄kpọ ke idiọk usụn̄ otịm otụk Pilate ke idem tutu onụk enye ndiyom usụn̄ efen ndinyan̄a enye. Enye ọdọhọ otuowo ete, “Sese, mmada Enye n̄wọrọ nsọk mbufo, man mbufo ẹfiọk ete, n̄kwe Enye idiọk ke idem.” Eyedi enye ekere ete ke ndikụt ndutụhọ ndutụhọ idaha Jesus eyemem mmọ esịt. Nte Jesus adade ke iso anana-esịtmbọm otuowo oro, ayarade itam n̄kukịm ye ididuot ekura ye ubiak ubiak iso esie oro ọwọrọde iyịp, Pilate ofiori ete: “Se Enye owo oro do.”

Okposụkedi ẹmiade ẹnyụn̄ ẹnọde enye unan, mi edi ata n̄wọrọnda owo ke ofụri mbụk, ke akpanikọ akakan owo oro akanam odude uwem! Ih, Jesus owụt ata ukpono ye nsụhọdeidem oro ayararede akakan idaha oro anamde idem Pilate onyịme, koro ikọ esie nte an̄wan̄ade esịne ukpono ye mbọm. John 18:39–19:5; Matthew 27:15-17, 20-30; Mark 15:6-19; Luke 23:18-25.

◆ Ke ewe usụn̄ ke Pilate odomo ndisana Jesus nyak?

◆ Didie ke Pilate odomo ndibiomode nduduọhọ mfep ke idemesie?

◆ Nso ibuana ke ndidi se ẹmiade?

◆ Didie ke ẹsak Jesus nsahi ke ẹma ẹkemia enye ẹma?

◆ Nso n̄kaiso ukeme ke Pilate anam ndisana Jesus nyak?