Se Akam Ọwọrọde

“Ke usem Hebrew, akpan ikọ oro adade ọnọ akam ọwọrọ oto orụn̄ ikọ oro, ‘ndikpe ikpe’, ndien orụk oro ẹsiwakde nditịn̄ mban̄a anam n̄kpọ . . . ọwọrọ ke ata ata usụn̄, ‘ndikpe ikpe nnọ idem.’” Ntre ke The Authorised Daily Prayer Book ọdọhọ. Se emi ọwọrọde edi nte ke kiet ke otu n̄kpọ oro akam anamde edi nte ke enye ekpenyene ndin̄wam owo ndikụt m̀mê imọ imada ekekem ye ndinen edumbet ye mme n̄kpọ oro Abasi oyomde.

Ke ntak emi, ke ofụri Bible, ẹsian nnyịn ẹte ke ibọhọke owo anam uduak Abasi, owo idikopke akam esie nte ọfọnde. “Jehovah ada nsannsan ye mme idiọkowo: edi okop akam nti owo.”—Mme Nke 15:29; 1 John 5:14.

Ndidụn̄ọde-idem ke iso Jehovah Abasi ke akpanikọ ekpenyene ndinam owo oro ọbọn̄de akam osụhọde idem onyụn̄ atua n̄kpọfiọk. Emi esịn odudu ke n̄ke Jesus aban̄ade atan̄idem Pharisee ye atua-n̄kpọfiọk ọbọ-a-tax ẹmi ẹkedide temple ndibọn̄ akam.—Luke 18:9-14.

Ntre, edide nnyịn ibọn̄ akam inọ Jehovah ndikọm, nditoro, m̀mê ndikpe enye ubọk, akam kpukpru ini edi idaha ndidụn̄ọde-idem. Ke usụn̄ emi, akam odụri nnyịn ekpere Jehovah akan onyụn̄ ọsọn̄ọ itie ebuana nnyịn ye enye.