Mme Mbono District “Ukpepn̄kpọ Abasi”
KPUKPRU mmọ oro ẹyomde ndibọ ukpep nto Jehovah ẹsak iso ẹse Mme Mbono District “Ukpepn̄kpọ Abasi” ye ọkpọsọn̄ udọn̄. Ndutịm usen inan̄ emi eyewụt mme akpan ikpehe ukpepn̄kpọ N̄wed Abasi oro ẹkpemede mme Christian ke mme ini ẹmi mme mfịna idemowo ye ndutịme ererimbot ẹkọride-kọri mi. Ndutịm emi eyen̄wam mmọ ndisọn̄ọ nda mbiọn̄ọ ‘ido ekededi eke ọbiọn̄ọde eti ukpepn̄kpọ’ ndinyụn̄ n̄kabade ndi nti mme andikpep Ikọ Abasi.—1 Timothy 1:10.
Nso nti uwụtn̄kpọ ke nnyịn inyene ndikpebe ntem! Akakan Andikpep idịghe owo efen ikan Jehovah Abasi ke idemesie! Ntem, Elihu nte enende ama ọdọhọ Job ete ke Jehovah edi enye “emi etemede nnyịn akan mme unam isọn̄, onyụn̄ anam nnyịn inyene ibuot ikan mme inuen enyọn̄.” Enye n̄ko ama obụp aban̄a Jehovah ete: “Anie eteme nte enye?” (Job 35:11; 36:22) Ẹtịn̄ ẹban̄a Abasi ke Isaiah 30:20 (NW) nte “Akwa Anditeme.”
N̄kukụre owo efen emi adianade Jehovah nte andikpep edi Eyen esie, Jesus Christ. Ẹkediọn̄ọ enye nte “Andikpep” ye nte “Anditeme,” ẹtịn̄de ẹban̄a enye ntre utịm ike 50 ke mme Gospel. Kpa ye ediwak inem inem ukọkudọn̄ọ ye utịben̄kpọ esie eken, owo ikọdiọn̄ọke Jesus nte Abiaibọk edi nte Andikpep, kpa Anditeme.—Matthew 8:19; Luke 5:5, NW; John 13:13.
Ke otịmde odot akan, Jesus ama ekpep mme mbet ye mme apostle esie ndidi mme andikpep nte enye ekedide. Nnyịn imekeme ndikụt emi ọtọn̄ọde ke Matthew 10:5 osịm 11:1 ye Luke 10:1-11. Ibio ini mbemiso ọdọkde aka heaven, Jesus ama ọnọ mme mbet esie utom edikpep oro ẹtịmde ẹdiọn̄ọ emi ẹwetde ke Matthew 28:19, 20: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye edisana spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” N̄wed Utom Mme Apostle, ọkọrọ ye mme leta eke odudu spirit oro ẹtienede enye ke N̄wed Abasi Christian Usem Greek, ẹbụk ẹban̄a nte mme akpa anditiene Jesus ẹkenamde utom ukpepn̄kpọ emi ke edinam akpanikọ ke ifịk ifịk, usọ usọ usụn̄.
Utom edikpep emi omotịm edi usọp usọp mfịn akan nte akanam edide. Nnyịn idu uwem ke mme akpatre usen eke editịm n̄kpọ emi, ndien ke ntak oro, uwem abuana. Man mme owo ẹtre nditiene mbuana ke mme idiọkn̄kpọ Akwa Babylon nnyụn̄ mbọ mme ufen esie, ana ẹkpep ẹnyụn̄ ẹn̄wam mmọ ẹwọrọ ke Babylon ẹnyụn̄ ẹnam ubiere ndinam n̄kpọ Jehovah ye Obio Ubọn̄ esie.—Ediyarade 18:4.
Man an̄wam kpukpru Mme Ntiense Jehovah ke ukeme mmọ ndinam utom edikpep n̄kpọ oro ẹnọde mmọ, Jehovah ebede ke esop esie amanam ndutịm ọnọ Mme Mbono District “Ukpepn̄kpọ Abasi.” Mme mbono usen inan̄ ẹmi ẹditọn̄ọ ke Nigeria ke November 1993. Akpakam asan̄autom Jehovah kiet kiet oro ayakde idem ọnọ okụt ete ke imodụk ke nsụhọde n̄kaha kiet ke otu mme mbono ẹmi, odude do onyụn̄ ọnọde n̄kpan̄utọn̄ ọtọn̄ọde ke ikwọ ye akam ediberede ke uwemeyo Thursday tutu osịm akam ediberi ke mbubịteyo Sunday.