Ẹnọ Utịp “anyanya Uwem”
ẸKEDỌHỌ apostle John ọnọ n̄wed ẹsọk angel esop Smyrna ete: “Wụt idem nte anam-akpanikọ tutu osịm n̄kpa, ndien nyenọ fi anyanya uwem.” (Ediyarade 2:8, 10) Ke ntre, edi n̄kpọ mfụhọ ye idatesịt nditọt mi nte ke Frederick William Franz, etieibuot Watch Tower Bible and Tract Society of Pennsylvania ye Watchtower Bible and Tract Society of New York, Inc., ọkọrọ ye andibuana ke mme otu ukara Abasi eken, ama okụre utom esie eke isọn̄ ke usenubọk December 22, 1992.
Emi edi ntọt oro akamade mfụhọ ke emi enye etịn̄de aban̄a utịt utom eke isọn̄ ata edima ye n̄wọrọnda anam-akpanikọ asan̄autom Jehovah. Edi, enye n̄ko edi ntọt idatesịt koro mme ikọ eke Ediyarade 14:13 omosu ke idem edima Brọda Franz nnyịn idahaemi: “Ọfọfọn ọnọ mme akpan̄kpa ẹmi ẹkpade ke Ọbọn̄, ọtọn̄ọde ke ini emi: spirit ete, Edi ntre; man mmọ ẹduọk odudu ke ọkpọsọn̄ utom mmọ; koro se mmọ ẹkenamde ẹtiene mmọ ke edem.” Brọda Franz eketie sụn̄sụn̄ onyụn̄ osụhọde idem, asan̄autom emi anamde utom ọkpọsọn̄ onyụn̄ on̄wụmde mfri etieti, emi Jehovah Abasi akadade anam n̄kpọ akamba akamba nte andibuana ke otu “asan̄autom emi anamde akpanikọ, onyụn̄ enyenede ọniọn̄” ndin̄wam ke ndinọ “mbonufọk” ye nsan̄a mmọ udia eke spirit.—Matthew 24:45-47.
Brọda Franz akamana ke September 12, 1893, ke Covington, Kentucky. Enye okokụt akpanikọ ebe ke akpaneka esie. Ke ini oro enye okodu ke University of Cincinnati, eben̄ede idem ndikabade ndi ọkwọrọikọ Presbyterian. Utu ke oro, enye ama adianade idem ọkpọn̄ Ufọkederi Presbyterian onyụn̄ akabade abuana ye Nditọ Ukpepn̄kpọ Bible, nte ẹkekotde Mme Ntiense Jehovah ini oro. Enye akana baptism ke November 30, 1913, ndien ke isua oro eketienede enye ama ọkpọn̄ unifesiti onyụn̄ odụk utom colporteur (usiakusụn̄). Ke June 1, 1920, enye ama akabade edi owo ufọk Bethel ke Brooklyn. Ikebịghike, ẹma ẹmek enye ndise mban̄a utom colporteur, ndien ke 1926 ẹma ẹnọ enye akanam utom ke itieutom uwet n̄wed, ke ebiet emi enye akanamde ekese utom. Ke 1945 enye ama akabade edi udiana etieibuot Watch Tower Society ye mme otu eken oro ẹbuanade. Ke Nathan H. Knorr, etieibuot ini oro ama akakpa ke 1977, enye ama akabade edi etieibuot Watch Tower Society. Enye akanam utom ke ifetutom oro tutu ke n̄kpa esie. Ke eyouwem esie, Brọda Franz ama okụt ibat Mme Ntiense Jehovah ọkọride ọtọn̄ọde ke ekpri tọsịn okosịm n̄kpọ nte miliọn inan̄ ye ubak. Enye ama adara ediwak ifetutom, emi esịnede edinọ utịn̄ikọ ke mme mbono ofụri ererimbot ye edika n̄kese mme n̄kọk itieutom ye mme ufọkidụn̄ isụn̄utom ke ediwak ikpehe ererimbot. Mbụkuwem esie ama odu ke nsiondi Enyọn̄-Ukpeme eke May 1, 1987.
Ke mbubịteyo Monday, December 28, 1992, ẹma ẹnịm edinam ubụkowo ke Ufọkmbono Obio Ubọn̄ ke Bethel eke Brooklyn. Brọda Albert D. Schroeder eke Otu Ukara ọkọnọ ufiop ufiop utịn̄ikọ oro ọbọpde-bọp ke n̄kan̄ eke spirit. Mbon oro ẹkekopde ebe ke urụk ukopikọ ẹkedi mbonufọk Bethel ke mme In̄wan̄ Enyọn̄-Ukpeme, Patterson, Mountain Farm, ye In̄wan̄ Obio Ubọn̄, ọkọrọ ye mbonufọk Bethel ke n̄kọk itieutom Canada.
Kpukpru owo, akpan akpan mbon oro ẹkenamde utom ọtọkiet ye enye, ẹyetaba Brọda Franz akamba akamba. Enye ekedi owo oro enyenede ikike, ọnọde nsịnudọn̄, onyụn̄ enyene ime ye kpukpru owo oro enye anamde utom ọnọ onyụn̄ adade aka isan̄. Ke akpanikọ, ekemmọ mme andinịm ke akpanikọ ẹma ẹnam n̄kpọ ye enye ke edu eke Mme Hebrew 13:7: “Ẹti mmọemi ẹkedade mbuot usụn̄, ẹmi ẹketịn̄de ikọ Abasi ẹnọ mbufo. Ẹtịm ẹse se uwem mmọ ọwọrọde ke akpatre, ẹnyụn̄ ẹkpebe mbuọtidem mmọ.”
Ke December 30, 1992, ẹma ẹmek Brọda Milton G. Henschelnte etieibuot N̄ka ọyọhọ ition,ndida itie Brọda Franz.
[Mme ndise ke page 31]
Frederick W. Franz ke 1913
Ke itie umịn̄n̄wed N̄ka eke Myrtle Avenue ke 1920
Ye Nathan H. Knorr ke An̄wambre Yankee ke 1953