Enyịn̄ Abasi

“Ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu.” Ntre ke uwetn̄kpọ Latin emi owụt. Mme ikọ ẹmi ẹkọn̄ọ ke Psalm 127:1 ke Bible, ndien mmọ ẹsịne ntotụn̄ọ akpanikọ: Ukeme ekededi oro mînyeneke edidiọn̄ Jehovah eyekpu ke akpatre.

Ẹkụt uwetn̄kpọ emi, oro ẹkewetde toto ke 1780, ke ufọk kiet ke Colombo, Sri Lanka, ndien enye edi se ẹtịmde ẹdiọn̄ọ koro enye esịnede enyịn̄ Abasi, Jehovah. (Se foto.) Ke mme ntọn̄ọ ntọn̄ọ isua ikie ẹma ẹsida enyịn̄ oro ẹnam n̄kpọ ntatara ntatara. Ẹma ẹsiwak ndiwet enye ke mme itieutom, ufọkabasi, idem ke okụk. Mme isụn̄utom ẹma ẹsida enyịn̄ Abasi ke ini mmọ ẹkedade Bible ẹka mme nsannsan ikpehe isọn̄, emi nte eyịghe mîdụhe edide ntak uwetn̄kpọ emi ke Sri Lanka.

Didie ke mme n̄kpọ ẹkpụhọde ntem mfịn! Ibat ibat owo oro ẹdọhọde nte idide Christian ẹkere ẹban̄a enyịn̄ Abasi. Ndusụk nditọ ukpepn̄kpọ ẹkam ẹsụk Mme Ntiense Jehovah uyo ke ndidori nsọn̄uyo ke enyịn̄ emi. Ntak-a? Nte ndusụk mmọ ẹdọhọde, koro owo mîfiọkke nnennen nte ẹkekotde enyịn̄ oro ke usem Hebrew. Edi owo ifan̄ ẹfiọk akpasarade usụn̄ oro ẹkekotde enyịn̄ Jesus ke usem Hebrew? Edi, ke ẹkot ẹnyụn̄ ẹkpono enyịn̄ esie ke ofụri ererimbot.

Ye Jesus, enyịn̄ Abasi ekedi ata akpan n̄kpọ. Enye ama ekpep nnyịn ndibọn̄ akam ntem ete: “Yak ikpono enyịn̄ Fo.” (Matthew 6:9) Ndien ekpri ini mbemiso n̄kpa esie, enye ama ọdọhọ Abasi ete: “Mma nyarade enyịn̄ Fo nnọ mme owo emi okosiode ke ererimbot ọnọ Mi.” (John 17:6) Mme ata Christian ẹdi mme anditiene nde ikpat Jesus. Nte mmọ n̄ko ikpenyeneke ‘ndiyarade enyịn̄ Abasi’? Mme Ntiense Jehovah ẹnam oro, ndien Jehovah ọmọdiọn̄ “ufọk” mmọ uwak uwak. Ye mmọ psalm oro edi akpanikọ: “Ọfọfọn ọnọ mbon eke Jehovah edide Abasi mmọ.”—Psalm 144:15.