Nte Ndausụn̄ Owo Omokpu?

ANIE okobot kpukpru n̄kpọ? Edieke ibọrọ fo edide “Abasi,” do afo esịne ke otu ediwak miliọn owo oro ẹnịmde Abasi a-⁠Bible, kpa Andibot, ke akpanikọ.

Edi, ediwak owo oro ẹnịmde Abasi ke akpanikọ ẹsikụt nte ọsọn̄de ndinyịme nte ke enye ke esịn idem ifịk ifịk ndikọk mme mfịna ubonowo. Nte odot ndikere nte ke Abasi enyene ndutịm oro ẹsụk ẹnamde emi edidade ubọhọ ọsọk ubonowo? Ediwak owo ikwe uyarade oro owụtde eti ibuot nte ke emi edi ntre.

Ke ediwak tọsịn isua, mme owo ẹdomo ata ediwak usụn̄ edin̄wam idemmọ ẹse ke ndidụn̄ọde nyom usọbọ, ẹsiode Abasi ẹfep. Edi nte mme owo ẹkụt usọbọ? Mîdịghe nte mme mfịna ẹtotịm ẹdiọk ẹnyụn̄ ẹsọn̄ ẹkan ndikọk? Didie ke owo ese aban̄a mme usọp usọp mfịna ke ererimbot mfịn?

Ataifiọk kiet esịn enye ke usụn̄ emi ete: “Ọtọn̄ọde ke ini Ukpụhọde ke Ndutịm Uforo, mme idụt uforo ẹsion̄o mme oto-obot inyene isọn̄ ke ebeubọk usụn̄ ẹda ẹnam ufọn ẹnọ idemmọ ebe ke mme usụn̄ edision̄o ye edidep mme n̄kpọ emi mîyụhọke owo, ẹbiatde n̄kann̄kụk ofụri ererimbot, ke ntre ẹnọde mme idụt oro ẹtọn̄ọde-tọn̄ọ uforo unan.”

Owo amakaiso ndisobo isọn̄. Clarín, n̄wedmbụk n̄kpọntịbe Argentina ama ọdọhọ ete: “Ke udiana ubak ọyọhọ isua ikie emi, idiọkitọn̄ ndutịm uforo, unana ediwụt ukpeme, ye unana ntịn̄enyịn ẹkedi ntak ikpọ afanikọn̄ oro mîkedịghe ntak n̄kpan̄a mme owo kpọt edi n̄ko abiatde n̄kann̄kụk, ediwak ini ke udomo oro owo mîkemeke nditịn̄.”

Idahaemi etie nte ọkpọsọn̄ unana edi taktak ikpehe ke n̄kaowo eyomfịn. Idem mme inua-okot idụt uforo ererimbot ke ẹduọ ẹdụk ọkpọsọn̄ unana. Nte ekemde ye The Globe and Mail eke Toronto, Canada, ẹnọ ekikere nte ke “mbahade kiet ke itie ita ke otu kpukpru mbon Canada ẹyedu ke unana ke ini uwem mmọ.” N̄wedmbụk n̄kpọntịbe oro adian ete ke “n̄wụre ubon edi kiet ke otu akpan mfịna kaban̄a unana, ndien idaha emi ọmọdọk ke mme isua ndondo emi.”

Edida n̄kpọsọn̄ ibọk ke idiọk usụn̄ edi idiọn̄ọ nditaha efen ke n̄kaowo. Nso ke ubonowo ekeme ndinam mban̄a oro? Nte an̄wan̄ade ata esisịt ke ofụri ofụri. Ediwak miliọn owo ke ẹkụt nditaha ke ikpọkidem, ekikere, ye ido uwem nte nnennen utịp ẹtode idiọk mbumehe edida n̄kpọsọn̄ ibọk. Ndien mfịna emi ke atara nte ikan̄ akai.

Etie nte mme ntaifiọk ke ẹkpu ke ẹn̄wan ndikan udọn̄ọ. Edi akpanikọ, ifiọk ubotn̄kpọ eyomfịn omokụt ekese unen. Edi, ndusụk usụn̄ unam n̄kpọ ifiọk ntaifiọk ke idemmọ ẹmetịp n̄kpọ ẹsịn ke ndinam mme udịm udịm enyene-ndịk n̄kpri unam udọn̄ọ oro mîkopke usọbọ ẹwọrọ ẹdi.

Mme ukara owo ikemeke nditre n̄kọri ke edibiat oro ẹbiatde unen mme owo. Ke uwụtn̄kpọ, kpa ye ediwak en̄wọn̄ọ ye ibet oro ẹsion̄ode ndida n̄kpan ufụn, ẹnọ ekikere nte ke ofụri n̄kanade ererimbot ẹmenyịk mme owo ẹwakde ẹkan miliọn ikie ndinam utom ke mme idaha oro ẹdide ukem ye ataata ufụn.

Edi ntak emi ndausụn̄ owo okpude? Kere ban̄a mme n̄kpọ ẹmi. Ndausụn̄ owo oto mme owo​—⁠mme owo ẹmi ukeme mmọ ẹnyenede-nyene adan̄a. Ifiọk eyouwem mmọ edi ukeuke ndien ẹnyụn̄ ẹnyenyene adan̄a oto ndusụk ido edinam m̀mê n̄kann̄kụk. Ifiọk mmọ n̄ko enyenyene adan̄a. Se ededi ndausụn̄ oro mmọ ẹnọde owụt mme adan̄a ẹmi. Nte apostle Paul ọkọdọhọde, “kpukpru owo ẹma ẹnam idiọkn̄kpọ, ẹnyụn̄ ẹtaba ubọn̄ Abasi.”​—⁠Rome 3:23.

Ke ata idem n̄kpọ n̄wakn̄kan mfịna ye nsọn̄ọn̄kpọ oro ata akamba ubak ubonowo ẹsobode ẹdi utịp ke ndifụmi ndausụn̄ Abasi edide ke nnennen usụn̄ m̀mê ke usụn̄ efen. M̀mọ̀n̄, ndien, ke ẹkeme ndikụt utọ ndausụn̄ oro? Didie ke Abasi ọnọ nnyịn ndausụn̄ mfịn? Ibuotikọ oro etienede eyeneme mme ibọrọ.