Ọsọn̄ Urua Akan Eme

Ibat isenowo oro ọkọride-kọri ẹmekop nduaidem ẹban̄a mme utọ ndise nte enyeemi odude ke mmọn̄ Ididuot Inyan̄.

Anana-ibat iyak ke ndiye uduot ye uyama ẹdi n̄kpọ oro enyenede mbon oro ẹwọkde ewọk ke afia mmọn̄ oro ndyọ. Edi kụt ete ke otu ndiye iyak oro ẹkụtde mi, odu mme utịbe utịbe n̄kpọ isọn̄ mmọn̄ efen oro ẹdụkde owo enyịn, ẹsịnede nyayama uduot eme.

Ẹkụt ndiye uduot eme ke ediwak udomo ye uduot. Nte afo ekemede ndikere, idem ke eset ndiye mbak eme ẹma ẹsisọn̄ urua etieti. Mme odom n̄kpọ ẹma ẹsida mmọ ẹdom ndiye n̄kpọmbana, ndien mme andiwet Bible ẹsiak eme ẹdian ye gold, silver, ye ruby. (Mme N̄ke 3:​14, 15; Ezekiel 27:16) Edi mme ewetn̄wed oro ẹn̄wam nnyịn ndikụt n̄kpọ mbe uyai ye ufọn eme ke idemmọ.

Mmọ ẹwụt ẹte ke ndusụk n̄kpọ ẹkam ẹsọn̄ urua ẹkan ye nte ke nnyịn ikpenyene ndida mmọ ke ata akpan n̄kpọ. Eti n̄wanndọ oro odotde edi kiet, koro nnyịn ikot ite: “Anie edikụt enyene ido an̄wan? N̄kọm ekọmurua esie akan pearl [“eme,” NW] anyanusụn̄.” (Mme N̄ke 31:10) Nte afo edi eren oro ọdọde ndọ? Fiak se ata ediye eme mi, nyụn̄ kere mme afo ke ada n̄wan fo ke n̄kpọ nte enye odotde.

Edide nnyịn idi irenowo m̀mê iban, mme ọdọndọ m̀mê mbon oro mîdọhọ ndọ, edikere mban̄a ndiye eme ekpenyene ndin̄wam nnyịn ndiwụt esịtekọm nnọ ọniọn̄, mbufiọk, ye ifiọk Abasi oro akam odotde akan. Ikọ Abasi ọdọhọ ete: “Ọfọfọn ọnọ owo eke osịmede eti ibuot, ye owo eke okụtde asian. Koro udori esie ọfọnde akan udori silver, mbun̄wụm esie onyụn̄ ọfọn akan eti gold. Enye ọsọn̄ urua akan pearl [“eme,” NW] kpukpru n̄kpọuto fo inyụn̄ ikemke ukem ye enye.”​—⁠Mme N̄ke 3:13-⁠15; 8:11.

Ntre edide ikụt mmọ ebe ke edika ewọk ke idem nnyịn m̀mê ke foto, eme Ididuot Inyan̄ ẹkpenyene ndinọ nnyịn ekikere uyai ye n̄kpọ ndikere mban̄a.