Ntọt M’Ọkwọrọ Obio Ubọn̄
“N̄kpọ Editi Ọnọ Edu Edidianakiet”
AKWA n̄kokon̄ obot itiat kiet oro ẹdiọn̄ọde nte Itiat Gibraltar odu ekpere ata utịt usụk usụk Spain. Ke ediwak isua ikie, itiat emi esidi idop idop n̄kpọ ntiense ọnọ eneni ukaraidem ye mfan̄a ofụri ererimbot. Ke edide isio ye oro, Itiat Gibraltar ke ndondo emi ekedi n̄kpọ ndida n̄wụt itie ebuana ye edidianakiet oro ananade ke ererimbot mfịn.
Obio La Línea, Spain, asanade ada ke n̄kpasịp kilomita ita ọkpọn̄ Itiat oro. Do utom edibọp Ufọkmbono Obio Ubọn̄ eke Mme Ntiense Jehovah ama atan̄ mbonutom unyịmesịt ke mme itie ikie ẹmi ẹnyenede udọn̄ nditịp ini ye odudu mmọ nsịn, edibok ọtọkiet. Nte mmọ ẹkenamde utom ndibọp itie utuakibuot oro odotde nnọ Andibot, Jehovah Abasi, enyene-uten̄e Itiat Gibraltar ikakam inyeneke se ọwọrọde ke ẹmende ẹdomo ye utom oro ẹkekamade ke ubọk.
Mme ọkwọrọ Obio Ubọn̄ ke ikpehe ererimbot n̄kan̄ oro ẹnọ ntọt oro etienede mi ẹdi:
“Ifịk ifịk mbonutom unyịmesịt 900 ẹma ẹnam utom okoneyo ye uwemeyo, ọtọn̄ọde ke uwemeyo Friday, September 24, 1993. Etisịm n̄kanika itiaba mbubịteyo Sunday, ẹma ẹwụk obufa idiọn̄ọ oro anamde ẹdiọn̄ọ ufọk oro nte Ufọkmbono Obio Ubọn̄ eke Mme Ntiense Jehovah, ndien ẹma ẹnịm ata akpa mbonoesop ke ediye obufa ufọk oro.
“Ediwak Mme Ntiense ẹtode n̄kpet n̄kpet Gibraltar ẹma ẹbe adan̄a obio oro man ẹdin̄wam nditọete mmọ ẹtode Spain. ‘Mme ubahade ke n̄kan̄ ukaraidem inamke edu ima nditọete ofụri ererimbot nnyịn ebịt,’ ntre ke owo utom unyịmesịt kiet akanam an̄wan̄a, kpa amanaisọn̄ eyen Gibraltar. Enye ama adian do ete: ‘Ke ediwak isua ẹmi ẹkebede, nditọete ẹtode La Línea ẹma ẹdin̄wam nnyịn ibọp Ufọkmbono Obio Ubọn̄ nnyịn ke Gibraltar, ntre nnyịn kemi imokop inemesịt nditiene n̄wụt mmọ mfọnido.’
“Man ẹsịn n̄kpọ ẹyọhọ ke mme ukeme ntatubọk oro esop Mme Ntiense Jehovah iba ye ediwak mbon usọ mme andin̄wam ke mme itie ikie oro ẹtode ikpehe obio Andalusia, obio La Línea ama ebiere ndinọ ekpri ubak isọn̄ oro ẹkeyomde. ‘Nte ido edide, mbon ukara Spain n̄kann̄kụk ẹsiwak ndinọ isọn̄ ẹda ẹbọp mme ufọkabasi Catholic,’ ntre ke etubom La Línea akanam an̄wan̄a ke ini enye akakade ndise itie ubọpufọk oro. ‘Ntak mînamke kpasụk ntre inọ mme n̄ka ido ukpono eken-e? Utom unana ibụk eke mbonutom unyịmesịt ẹmi enem mi esit etieti, ndien ami n̄kere ke mmọ ẹdot ndibọ un̄wam nto nnyịn. Nnyịn imenen̄ede iyom utọ edu emi ke ererimbot mfịn oro abaharede mi.’
“Enye ama etịn̄ otụk Ufọkmbono Obio Ubọn̄ oro nte ‘n̄kpọ editi ọnọ edu edidianakiet.’ Ke akpanikọ, se ikotụkde owo ke idem ikan ikedịghe ndutịm ubọpufọk m̀mê ubom ufọk oro. Utu ke oro, se ikotụkde ediwak owo ke obio oro ekedi akpanikọ oro nte ke edi mbonutom unyịmesịt ẹkebọp ufọk oro ke idemmọ ndien ẹkeda hour 48 kpọt ẹbọp!”
Ana in̄wan̄în̄wan̄ nte ke Mme Ntiense Jehovah ke La Línea ye ke n̄kann̄kụk esie ke ẹnam akpanikọ ẹnọ mme ikọ Galatia 6:10. Do apostle Paul ọkọnọ ekemmọ mme andinịm ke akpanikọ item ete: “Mmọdo ndien, adan̄a nte ikụtde ifet, ẹyak nnyịn ifọn ido ye kpukpru owo, akpan akpan ye mmọemi ẹtode ke ufọk mme andinịm ke akpanikọ.”