Iban Ke Ofụri Ererimbot
KE INI akpa owo iba oro ẹkesọn̄de ibuot ye Abasi, Jehovah ama ebemiso etịn̄ akama-nsobo utịp oro ẹdisịmde mmọ ye nditọ mmọ. Jehovah ọkọdọhọ Eve ete: “Eyenyụn̄ osụk idem ọnọ uberi ndien enye eyekan fi.” (Genesis 3:16) Bible kpukpru ini esịn udọn̄ ọnọ edinọ iban ntotụn̄ọ ukpono, ndien ediwak miliọn iban ẹdara uwem oro enen̄erede ọnọ inemesịt ye uyụhọ koro mmọ ye ubon mmọ ẹdade mme edumbet Bible ẹsịn ke edinam.
Nte ededi, nte ekemde ye ntọt eke ndondo emi kaban̄a mme unen owo, ke ofụri ererimbot ẹse ediwak iban eken ke usụhọde, ẹnam n̄kpọ ke ukwan̄ usụn̄, ẹnyụn̄ ẹsuene. Ke etịn̄de n̄kpọ aban̄a ntọt oro, International Herald Tribune ọdọhọ ete: “Ke ẹtịn̄de enyịn ẹyom ọyọhọ ntọt, ntọt ẹtode idụt 193 . . . ẹwụt mfụhọ mfụhọ idaha asari ye esuene eke usen ke usen.”
Nte ibat ibat uwụtn̄kpọ: Ke ufọt ufọt Africa, nditọiban ẹnyene ndinam ekese n̄kpọsọn̄ utom ke in̄wan̄, ndien mbahade kiet ke itie ita kpọt ke otu mmọ ẹka ufọkn̄wed ke ẹmende ẹdomo ye irenowo. Ke idụt kiet do, efịbe edi ibet ọnọ iban edi idịghe inọ irenowo. Ibet ke idụt Africa kiet esifen ebe emi owotde n̄wan esie edieke omụmde enye nte esịnde efịbe, edi ibet isifenke n̄wan emi owotde ebe esie ke ukem idaha oro.
Ntọt oro ọdọhọ ete ke ndusụk ikpehe ke South America, mme bodisi isiwụtke iban oro ẹmiade mbọm. Ndien iban oro ẹnamde utom ẹsinyene ndida okụk utom mmọ oro adade mbahade 30 osịm 40 eke ikie osụhọrede akan eke irenowo ndu uwem.
Ke ndusụk ikpehe ke Asia, iban ẹdi mbon unọmọ ẹmi ẹnyịkde-nyịk ẹtre uman nditọ ẹnyụn̄ ẹsion̄o idịbi. Ke idụt kiet, akpara ẹwakde ẹsịm 500,000 ẹdu, ete ye eka ẹkenyam ediwak ke otu ẹmi ẹnọ unam akpara ke ndiyom okụk edin̄wamde mmọ ẹdep obufa ufọk idemmọ. Mme bodisi ke idụt efen ẹnyene ndise mban̄a ntatara “n̄kpan̄a ukpe n̄kpọ ndọ”—ebe m̀mê ubon esie esiwot n̄wan koro n̄wan oro mîkọnọhọ n̄kpọ ndọ esie awak nte ẹkedoride enyịn.
Kaban̄a Jesus Christ, Bible ọn̄wọn̄ọ ọnọ nnyịn ete: “Enye eyenyan̄a ubuene ke ini esemede; ye owo ukụt, ye owo eke mînyeneke andinyan̄a. Enye eyetua eyen unana ye ubuene mbọm, onyụn̄ anyan̄a ukpọn̄ mme ubuene. Enye eyefak ukpọn̄ mi osio ke ukụt ye nnama: onyụn̄ ese iyịp mmọ ke n̄kpọuto.” (Psalm 72:12-14) Ntre nnyịn imenyene ntak ndinyene idotenyịn; iban ke ofụri ererimbot ẹkeme ndidori enyịn ndikụt mme idaha oro ẹfọnde ẹkan ẹmi ẹdidude ini oro.