“Uwụtn̄kpọ Edidianakiet ye Itie Nditọete”

Oro edi nte n̄wan kiet eketịn̄de aban̄a edinam Mme Ntiense Jehovah ke ini owo kiet ke ubon esie ke mfụhọ akakpade. Enye anam an̄wan̄a ete:

“Ke ibuot mi ye ubon mi, n̄kpama ndikọm Mme Ntiense eke esop Italy ke Freiburg, Germany. Ke ẹsiode eyeneka mi Antonio ye n̄wan esie, Anna, ẹfep, ubon mi idịghe Mme Ntiense Jehovah. Nnyịn ke anyan ini ima isikụt ndudue ino ido ukpono oro mmọ ẹkemekde, okposụkedi nnyịn kpukpru ini isiwụtde ukpono inọ enye.

“Nte ededi, nnyịn inyene ndikpụhọde ekikere nnyịn idahaemi. Ke akpanikọ, nnyịn ima ikụt uwụtn̄kpọ itie nditọete ye ima oro nnyịn mîkekereke ite iyokụt tutu amama.

“Ke mfụhọ, Anna ama akpa ke ini mîkemke ke mbabuat n̄kpọntịbe ọkpọusụn̄. Sia nnyịn idụn̄de ke Italy, nnyịn ikekeme ndidu n̄kpere eyeneka mi Antonio ye nditọ esie ke esisịt ini. Nditọete esie ẹdide Mme Ntiense ẹma ẹdinọ un̄wam. Mmọ ẹma ẹn̄wam enye ke ndidu do, ke ikọ mmọ, mbuọtidem mmọ, ke ata ata usụn̄, ke ido uwem, ye ke ndutịm uforo. Sia mmen̄kemeke ndikọm esop oro ke idem mi, n̄kpama ndikọm mmọ ebe ke magazine mbufo kaban̄a uwụtn̄kpọ edidianakiet ye itie nditọete oro nnyịn mîdifreke.”

Ẹwụt esịtekọm ẹban̄a eti ikọ n̄wan emi. Nte enye okokụtde, Mme Ntiense Jehovah ẹdi otu nditọete ofụri ererimbot. (1 Peter 2:17) Mmọ ẹkọri ọkpọsọn̄ mbọbọ ima ke otu idemmọ, ẹfiọkde ẹte ke ima ‘edi se ibọpde uwem idian inam ọfọn ama.’ (Colossae 3:14) Idem ke ata ndiọkn̄kan idaha, emi ekemede ndisịm kpukpru nnyịn, Mme Ntiense Jehovah ẹsisọn̄ọ ẹyịre ye Abasi ye ikọt esie.—Mme N̄ke 18:24; Ecclesiastes 9:11; John 13:34, 35.