“Tịm Teme Eyenọwọn̄”

DITỌ in̄wan̄esa oro okụtde unen etịm oyom n̄kpọ akan edisuan ndusụk n̄kpasịp ke isọn̄ ndien ekem afiakde aka ndidọk ọfiọn̄ ifan̄ ke ukperedem. Ekese ọkpọsọn̄ utom abuana ke ndidiọn̄ isọn̄, nditọ n̄kpasịp, ye ke ndiduọk mmọn̄ nnyụn̄ mbọk mfri man mmọ ẹkeme ndikọri nsịm ọyọhọ idaha.

Edinam emi ekeme nditịm n̄wụt nte Mme N̄ke 22:6 edide akpanikọ, emi ọdọhọde ete: “Tịm teme eyenọwọn̄ nte ekemde ye usụn̄ esie: ke ini enye akabarede idem akani owo, enye idikpọn̄ke enye.” Ke akpanikọ, ukpep otode ete ye eka ẹdi akpan n̄kpọ ke edibọk eyen ke usụn̄ oro okụtde unen.

Nte ededi, ke anana-ukpan ererimbot mfịn, ediwak ete ye eka ẹkpu ndinam item emi. Ke ini mmọ ẹtienede ọsọ ọniọn̄ oro nte ke ana nditọ ẹse ẹban̄a mme mfịna ke idem mmọ, ẹsiwak ndisana nditọ mmọ nyak ndibọk idemmọ ikpọn̄. Utọ edinam emi esisio nditọ anyan ọnọ idiọk odudu mme oburobụt owo oro mîdaha mme edumbet idu uwem.—Mme N̄ke 13:20.

Etịm ọfọn adan̄a didie mme ete ye eka ndisịn mme edumbet Christian ke esịt nditọ mmọ ebe ke ndinọ ukpep ke usụn̄ Abasi ke ntọn̄ọ ntọn̄ọ isua emana! Ẹkpebak adan̄a didie? “Toto ke uyen,” ntre ke apostle Paul ọkọdọhọ. Ntre ke ekedi ye akparawa oro Timothy. Eka esie, Eunice, ye eka eka esie Lois ẹma ẹsịn “edisana N̄wed Abasi” ke esịt Timothy man enye ‘ekpep’ onyụn̄ ‘etịm ọfiọk.’ Nso ikedi utịp? Utọ ukpep oro ama enyene akpan udeme ke ndinam enye “ọwọrọ ọniọn̄ ọbọ edinyan̄a.”—2 Timothy 1:5; 3:14, 15.

Kpasụk ntre mfịn, mme ete ye eka ẹmi ‘mîkpaha mba ke edinam eti n̄kpọ’ ẹyedọk akpakịp utịp edieke ‘mîyakke idem emem mmọ.’ (Galatia 6:9) Enyene-ọniọn̄ Edidem Solomon ọdọhọ ete: “Esịt eyenem ete eti eyen eti-eti.”—Mme N̄ke 23:24.