Ndausụn̄ ke Ndimek Nti Nsan̄a

N̄KPARAWA owo ẹsise mme uke mmọ utu ke ndise mme ete ye eka mmọ kaban̄a ndausụn̄ ke ndimek edisịnen̄kpọ ye ikwọ, ntre ke ntọt kiet ke Reader’s Digest ọdọhọ. Ke ntre edi akpan n̄kpọ mme ete ye eka ndifiọk mme owo ẹmi nditọ mmọ ẹdade ẹdụk nsan̄a ye ebiet emi ẹdude.

“Edi mbiomo mbufo ndidụn̄ọde,” ntre ke Esmé van Rensburg, akwa ekpepn̄kpọ ke ikpehe ukpepn̄kpọ aban̄ade ekikere ke ufọkn̄wed ntaifiọk kiet ke South Africa, ọdọhọ. Enye adian ete: “Se idude edi nte ke eyen fo ayayat esịt ye afo, edi esịt oyosụhọde mmọ.” Ekem enye ọnọ mme ete ye eka mme ekikere ẹtienede mi. Mme ibet ẹkpenyene ndisịne ifiọk ẹnyụn̄ ẹnyene mme akpan edumbet; kpan̄ utọn̄ nọ eyen fo; kûnam n̄kpọ ube ubọk, edi sụhọde idem, nyụn̄ fiọk se oyomde nditịn̄. Edieke edide eyen fo ama ananam ufan ye nsan̄a emi mûmaha, sọn̄ọ tịn̄ idiọk edu emi itie ufan oro esịnde udọn̄ ọnọ utu ke ikpîkpu edikpan n̄kaiso ndụk.

Eti item ẹnọde mme ete ye eka ama ododu ke anyan ini ko ke Ikọ Abasi, kpa Bible. Ke uwụtn̄kpọ, enye ọdọhọ ete: “Ẹsọp ndikop ikọ, ẹkûsọp nditịn̄ ikọ.” (James 1:19) N̄wed Abasi ọnọ eti item emi n̄ko ke ndimek mme nsan̄a: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.” (Mme N̄ke 13:20) Mme uwụtn̄kpọ ẹmi ẹwụt eti ọniọn̄ emi odude ọnọ mbon oro ẹkotde Bible ye esịtekọm ẹnyụn̄ ẹdade se enye etịn̄de ẹsịn ke edinam ke uwem eke usen ke usen.