Mme Ete ye Eka Ẹsua Asari Andikpep

Andikpep ke ufọkn̄wed praimari kiet ke Cassano Murge, Italy, ama ọnọ ndusụk nditọ ufọkn̄wed esie n̄kpri ubak babru ẹda ẹnyọn̄ ufọk. N̄kpri ubak babru ẹmi, ẹmi akanade ẹdian ke enyịnusụn̄ ufọk mmọ, akakama ntọt emi: “Nnyịn idi mbon Catholic. Ẹdọhọ Mme Ntiense Jehovah ẹkûkọn̄ enyịnusụn̄ emi.”

Ndusụk ete ye eka nditọ ufọkn̄wed ẹmi, okposụkedi mîkedịghe Mme Ntiense Jehovah, ẹma ẹsua edinam andikpep oro ọkpọsọn̄ ọkpọsọn̄. Nte n̄wedmbụk n̄kpọntịbe oro Muoviti Muoviti ọdọhọde, mme ete ye eka oro ẹma ẹdọhọ ẹte ke ‘ndinọ nditọwọn̄ utọ etop emi etịp esịn ke mmọ ndisịn owo ekededi emi mîkereke n̄kpọ nte mmọ ẹkerede m̀mê nditre ndidụk ndụk ye owo sia enye enyenede ido ukpono emi edide “isio.”’ Eka kiet emi ekewetde leta ọnọ ẹsọk n̄wedmbụk oro okokot ekpri ubak babru emi “n̄kpasịp idiọkn̄kpọ, utịp unana ifiọk ye nditen̄.”

Nte mbụk emi owụtde, ediwak mbon ẹmi ẹnyenede eti esịt ẹdiọn̄ọ mme n̄kpọndịk ẹmi ẹdude ke ndisuan n̄kpasịp asari. Mmọ n̄ko ẹnyene ukpono ẹnọ utom ukwọrọikọ Christian emi Mme Ntiense Jehovah ẹnamde ke ofụri Italy ye ke ofụri ererimbot. Ntak mûbụpke Mme Ntiense ‘ntak idotenyịn emi mmọ ẹnyenede’? Mmọ ẹyenyene ọkpọsọn̄ udọn̄ ndineme emi ye afo, ẹnamde oro ke “ido uten̄e.”—1 Peter 3:15.