Anie Editre Afai?

Ke September 1999, Akwa Ewetn̄wed UN, Kofi Annan ama adara mme andidụk Akwa Mbono eke isua ke isua ọyọhọ 54. Nte ẹketọtde ke The Toronto Star, enye ama enịm n̄kpọ-ata ke iso mme adaiso ererimbot, ọdọhọde ete: “Ata ediwak owo ẹdu ẹmi ẹyomde se ikande sụk mme ikọ mbọm ẹto ofụri ererimbot. Mmọ ẹyom ata ediomi oro ọsọn̄ọde ada man an̄wam ke nditre udịm udịm afai oro mmọ ẹsobode, nnyụn̄ ntọn̄ọ ndutịm oro adade esịm uforo.”

Nte UN ye mme idụt oro ẹbuanade ke enye ẹkeme ndinọ “ata ediomi oro ọsọn̄ọde ada” oro ẹyomde man ẹtre afai? Nte ẹkotde ẹto ntọt Star oro, Adaibuot Ukara United States oro Bill Clinton ọkọdọhọ ete: “Ke kpukpru uduọkiyịp eke isua ikie emi ẹma ẹkebe, nnyịn imọfiọk ke edi mmemmem n̄kpọ ndidọhọ, ‘oro iditịbeke aba tutu amama,’ edi enen̄ede edi ọkpọsọn̄ n̄kpọ nditre enye.” Enye ama adian do ete: “Ndin̄wọn̄ọ un̄wọn̄ọ awak akaha ekeme ndidiọk ukem nte edinọ esisịt ntịn̄enyịn.”

Ke se ikande isua 2,500 ẹmi ẹkebede, prọfet Jeremiah ama etịn̄ aban̄a mme ukeme owo ete: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jeremiah 10:23) Do, nso idotenyịn idu kaban̄a editre afai?

Nte nnyịn ikotde ke Isaiah 60:18, Abasi ama ọn̄wọn̄ọ ete: “Idikopke aba afai ke isọn̄ fo, idikopke n̄wụre ye nsobo ke esịt adan̄a fo.” Ntịn̄nnịm ikọ oro ama enyene akpa edisu ke ini Abasi akadade ikọt esie ẹmi ẹkedude ke ntan̄mfep ọnyọn̄ obio emana mmọ. Enye n̄ko enyene edisu oro okponde akan, oro nnyịn ikemede ndinyene. Jehovah Abasi ‘in̄wọn̄ọke un̄wọn̄ọ awak akaha.’ Nte Ata Edikon̄ ye Andibot ubonowo, enye odu ke eti idaha nditre “udịm udịm afai.” Emem ọyọyọhọ ke idak Obio Ubọn̄ Abasi. Afai eyebe efep ke nsinsi!—Daniel 2:44.