Ntak Efende Ọnọ?

“NTAIFIỌK ẹmenam ndụn̄ọde emi ọtọn̄ọde ndiyarade nte ke edifen nnọ ekeme nditịp nsịn ke nsọn̄idem eke ntụk ye eke ikpọkidem,” ntre ke The Toronto Star eke Canada ọtọt. Edi, Prọfesọ Carl Thoresen eke Ufọkn̄wed Ntaifiọk Stanford, U.S.A., kpa adausụn̄ ke ndụn̄ọde Edifen Nnọ ke Stanford, ọdọhọ ete ke “ibat ibat owo ẹfiọk se edifen nnọ edide ye ufọn esie.”

Ẹda edifen nnọ ke ofụri esịt nte akpan ikpehe Ido Ukpono Christ. Ntọt The Toronto Star ọdọhọ ke enye ọwọrọ “ndifiọk nte ke owo edue fi, ndifre mban̄a kpukpru utọk ẹmi ẹsụn̄ọde ẹto emi, ndien ekem anam n̄kpọ ye owo oro eduede fi ke mbọm ye ima.” Enye enyene ndikpụhọde ye edu edifụmi, edinọ ntak, edifre, m̀mê edisịn ndinyịme ndudue; enye inyụn̄ iwọrọke nditịn̄ ikọ isụn̄i. Ntọt oro ọdọhọ ete ke ukpọhọde edifen nnọ ke ofụri esịt edi “nditre iyatesịt ye mme etikwo etikwo ekikere.”

Mme anam ndụn̄ọde ẹdọhọ ke oyom ẹnam ndụn̄ọde efen efen ẹban̄a mme ufọn eke ikpọkidem ẹmi edifen nnọ enyenede. Nte ededi, mmọ ẹtọt ẹban̄a mme ufọn eke ekikere, esịnede “mfịghe, editịmede esịt ye mfụhọ ndisụhọde.”

Ẹwụt eti ntak kiet ndifen nnọ ke Ephesus 4:32, emi ọdọhọde ete: “Ẹfọn ido ye kiet eken, ẹnyụn̄ ẹnyene esịt mbọm, ẹnyụn̄ ẹfen kiet eken, kpa nte Abasi okonyụn̄ efende mbufo ke Christ.” (Sịghisịghi ubọkn̄wed edi eke nnyịn.) Kaban̄a edifen nnọ, nte edide ye mme n̄kpọ efen, ẹsịn udọn̄ ẹnọ nnyịn ẹte idi mme andikpebe Abasi.—Ephesus 5:1.

Nditre ndifen nnọ mmọ en̄wen ke ini isọn̄ odude ndiwụt mbọm ekeme nditụk itie ebuana nnyịn ye Abasi idiọk idiọk. Jehovah oyom nnyịn ifen kiet eken. Do nnyịn imekeme ndibọn̄ akam ite enye efen ọnọ nnyịn.—Matthew 6:14; Mark 11:25; 1 John 4:11.