‘Mmọ Ẹtịn̄ Ẹban̄a Eti Ido ye Ima’

KE MME isua ndondo emi, ẹmedori Mme Ntiense Jehovah ekese ikọ ke France. Mme asua mmọ ẹda mme ikọ emi mîdịghe ofụri akpanikọ ye mme ukwan̄ ntọt ẹdori mmọ ikọ an̄wan̄wa. Ke ntọn̄ọ ntọn̄ọ 1999, Mme Ntiense Jehovah ke ofụri France ẹma ẹsuan tract ẹkotde People of France, You Are Being Deceived! esịm idem miliọn 12. Ke tract emi, mmọ ẹma ẹwụt nte ke mme edori ikọ oro ẹkedoride mmọ ẹkedi nsu.

Usen ifan̄ ke ẹma ẹkekụre ubịnikọt oro, Mr. Jean Bonhomme, abiausọbọ ye akani andibuana ke Ufọkmbet ama ọnọ leta unana edinyịme ẹsọk mme ewet n̄wedmbụk n̄kpọntịbe n̄kann̄kụk. Enye ekewet ete: “Mme Ntiense Jehovah ẹsidi ufọk mi ke ini ke ini. Mmọ ẹsidi ẹditịn̄ ẹnọ mi ẹban̄a eti ido ye ima unana asari. . . . Mmọ isikaha ebiet owo mîyomke mmọ. Mmọ ẹsitịn̄ ikọ emem emem ẹnyụn̄ ẹnen̄ede ẹkpan̄ utọn̄ ẹnọ mme ekikere mi.”

Ke etịn̄de aban̄a idaha ekikere Mme Ntiense Jehovah ke n̄kan̄ eke spirit, Mr. Bonhomme ọkọdọhọ ete: “Ọsọsọn̄ mbon oro mînyeneke ekese ifiọk ererimbot, nte mmọ, ndinọ owo unan ekededi. Ke n̄kan̄ eken, unana ifiọk ndusụk mbon mbre ukara edi n̄kpọndịk ọnọ emem nditọisọn̄ ye edidianakiet n̄kaowo.”