Ẹnọ Ediyom Anyan Ini Utịp
“JEHOVAH? Anie edi Jehovah?” Silvia oro ekedide isua itiaita ke emana ama okụt enyịn̄ oro ke Bible usem Armenia, kpa n̄kpọuto ubon oro ekpri eyenan̄wan en̄wen okowụtde enye. Enye ama obụp mme owo, edi owo ndomokiet ke Yerevan, Armenia, emi enye okodụn̄de ikekemeke ndisian enye owo oro Jehovah edide—ete ye eka esie, mme andikpep esie, idem mme ọkwọrọikọ ufọkabasi n̄kann̄kụk ikekemeke.
Silvia ama ọkọri okpon, okụre ufọkn̄wed, onyụn̄ ọtọn̄ọ utom, edi enye ikosụk ifiọkke owo oro Jehovah edide. Nte n̄kaiferi, enye ekenyene ndifehe n̄wọrọ ke Armenia, ndien ke ndusụk ini ẹbede enye ama ekesịm Poland, okodụn̄ ye mbon itọkekọn̄ en̄wen ke ekpri ubet kiet. Kiet ke otu mbon ubet esie ama enyene isenowo oro ẹkesidide ẹdise enye kpukpru ini. Silvia ama obụp ete: “Isenowo fo ẹdi mmanie?” Ibọrọ ekedi: “Mmọ ẹdi Mme Ntiense Jehovah, mmọ ẹsidi mi ndikpep mi Bible.”
Esịt ama enem Silvia ke ini enye okokopde enyịn̄ oro Jehovah. Ke akpatre, enye ama ọtọn̄ọ ndikpep enye emi Jehovah edide ye nte ke enye edi ima ima Abasi. Nte ededi, ikebịghike, enye ekenyene ndikpọn̄ Poland. Enye ama ebe Inyan̄ Baltic okoyom ubọhọ ke Denmark. Enye akada ibat ibat inyene, edi mme n̄wed Bible oro Mme Ntiense Jehovah ẹsiode ẹma ẹdu ke otu mmọ. Ke ikpaedem n̄wed kiet, Silvia ama okụt udịm udịm adres ọfis n̄kọk itieutom Watch Tower Society. Oro ekedi kiet ke otu ata akpan inyene esie—usụn̄ enye ndinyene nneme ye Jehovah!
Ke Denmark, ẹma ẹda Silvia ẹka itienna mbon itọkekọn̄, ndien enye ama ọtọn̄ọ ndiyom Mme Ntiense Jehovah usọp usọp. Enye ama okụt ke udịm udịm adres esie ete ke ọfis n̄kọk itieutom Watch Tower Society ke Denmark okodu ke obio Holbæk. Edi m̀mọ̀n̄ ke Holbæk okodu? Ẹma ẹmen Silvia ke tren ẹka itienna en̄wen, ndien ke usụn̄, tren oro ama awat ebe ke Holbæk! Inikiet efen, esịt ama enem enye.
Ikebịghike ke oro ebede, ke usen oro eyo akayatde, Silvia ama odụk tren oro afiak aka Holbæk onyụn̄ asan̄a ọtọn̄ọde ke itiembehe oro ekesịm ọfis n̄kọk itieutom. Enye eti ete: “Ke mma n̄kodụk in̄wan̄esa, mma nsụhọde ntetie ke anyan n̄kpọitie nnyụn̄ ndọhọ idemmi nte, ‘Paradise edi emi!’” Ẹma ẹdara enye ufiop ufiop ke n̄kọk itieutom oro ndien ke akpatre ẹma ẹkeme nditọn̄ọ ukpepn̄kpọ Bible ye enye.
Edi ke oro ebede ẹma ẹsio enye ndien ndien ke itienna kiet ẹka en̄wen. Ke itienna kiet kiet oro ẹkenọde enye aka, Silvia ekenyene ndiyom Mme Ntiense Jehovah n̄kụt nnyụn̄ mfiak ntọn̄ọ ukpepn̄kpọ Bible esie. Kpa ye oro, ke isua iba ẹma ẹkebe, enye ama ekpep n̄kpọ ekem ndiyak uwem esie nnọ Jehovah. Enye ama ana baptism ndien esisịt ini ke oro ebede enye ama odụk utom ukwọrọikọ uyọhọ ini. Ke 1998 ukara Denmark ama ọnọ enye ubọhọ.
Idahaemi Silvia edi isua 26 ke emana onyụn̄ anam utom ke itie oro eketide enye aban̄a paradise, kpa ọfis n̄kọk itieutom Mme Ntiense Jehovah ke Denmark. Enye ọdọhọ ete: “Nso ke n̄kpetetịn̄? Mmoyom Jehovah toto ke ini n̄kedide ekpri n̄kaiferi. Idahaemi mmokụt enye. Mma nsinyene ọkpọsọn̄ udọn̄ ndida uwem mi nnam utom esie, ndien se mi mi ke Bethel. Mbọn̄ akam nte emi akpakam edi ebietidụn̄ mi ke ediwak isua oro ẹdide ke iso!”