Nte Afo Emenyene Ọniọn̄?

KE NDIMEK mme ebiereikpe Israel, Moses ama odomo ndiyom ‘mbon eti ibuot, ye mbon ọniọn̄, ye mbon ikike.’ (Deuteronomy 1:13, NW) Mbufiọk, oro akasan̄ade ye isua emana, ikedịghe n̄kukụre n̄kpọ oro ẹkeyomde. Eti ibuot ye ọniọn̄ ẹkedi akpan n̄kpọ n̄ko.

Owo oro enyenede ọniọn̄ esiwụt eti ubiere ke ikọ ye ke edu. Nte ekemde ye Webster’s Ninth New Collegiate Dictionary, owo oro enyenede ọniọn̄ “ekeme ndidop uyo ọniọn̄ ọniọn̄.” Ih, odu “ini eke ẹtịn̄de ikọ,” “ini eke ẹdopde” onyụn̄ odu, ndien owo oro enyenede ọniọn̄ esifiọk ukpụhọde oro odude. (Ecclesiastes 3:7) Ediwak ini, eti ntak esidu ndidop uyo, koro Bible ọdọhọ ete: “Awak ikọ inua itreke ndidue: edi owo eke omụmde n̄kpọk-inua esie akama edi ọniọn̄.”—Mme N̄ke 10:19.

Mme Christian ẹsidu ke ukpeme ndiwụt ọniọn̄ ke mme edinam mmọ ye kiet eken. Idịghe owo oro esitịn̄de ikọ awak m̀mê ọsọn̄ uyo akan esidi ata akpan owo kpukpru ini. Ti, Moses ekedi “ọkpọsọn̄ owo ke ikọ-inua,” edi enye ikekemeke ndida idụt Israel usụn̄ uforo uforo ibọhọke ke enye ama ọkọkọri ime, ifụre ifụre ido, ye mfara ke idem. (Utom 7:22) Ke ntre, ana mbon oro ẹnọde mmọ odudu ndikpeme mbon efen ẹdomo akpan akpan ndisụhọde idem ẹnyụn̄ ẹwụt edu edinyịme nnọ.—Mme N̄ke 11:2.

Ẹtịn̄ ẹban̄a mbon oro Jesus ayakde “kpukpru se enye enyenede” ọnọ ke Ikọ Abasi nte mbon oro ‘ẹnamde akpanikọ, ẹnyụn̄ ẹnyenede ọniọn̄.’ (Matthew 24:45-47) Mmọ isidaha ibụmede ntan̄idem ibe Jehovah iso; m̀mê mmọ ndikpọt edem ke ini ẹnamde ndausụn̄ Abasi ke n̄kpọ an̄wan̄a. Mmọ ẹsifiọk ini eke ẹkpetịn̄de ikọ ye ini eke ẹkpebetde ke ndopuyo kaban̄a n̄kaiso edinam an̄wan̄a. Kpukpru Christian inamke ọfọn ndikpebe mbuọtidem mmọ kpọt edi n̄ko ke ndiwụt idemmọ nte mbon ọniọn̄, ukem nte otu asan̄autom owụtde.—Mme Hebrew13:7.