“Uwụtn̄kpọ Edidianakiet”

ORO ekedi ibuotikọ uwetn̄kpọ oro ẹkemịn̄de ke n̄wedmbụk n̄kpọntịbe kiet ke Indaiatuba, São Paulo, Brazil. Mmanie ẹkenịm uwụtn̄kpọ oro? Andiwet anam an̄wan̄a ete: “Mme Ntiense Jehovah, oro ẹdiomide ndibọp obufa ‘Ufọkmbono Obio Ubọn̄,’ nte ẹsikotde mme temple m̀mê mme efe mbono mmọ, ke ẹnịm n̄wọrọnda ye eti uwụtn̄kpọ edidianakiet oro owo mîkemeke ndifụmi.”

Ẹsikụt edidianakiet oro odude ke otu Mme Ntiense Jehovah ke mme utọ idaha oro. Ntem, ibuotikọ oro ama ọdọhọ ete: “Edi se itụkde owo ndikụt mme anamutom unyịmesịt ẹdide iren, iban, ye mme uyen oro ẹnamde utom ọtọkiet ke ndibọp itie oro mmọ ẹkemede ndisop idem ọtọkiet nnyụn̄ ntuak ibuot nnọ Abasi.”

Mme Ntiense Jehovah ẹnịm eti uwụtn̄kpọ ke mme afan̄ efen n̄ko. N̄wedmbụk n̄kpọntịbe oro ama adian do ete: “Ke adianade ye edikpep n̄kpọ ye edibọn̄ akam, uduak mmọ edi ndinam mme akpammịn ye mme enyene-mbumehe uda n̄kpọsọn̄ ibọk ẹnam ukpụhọde, nnyụn̄ n̄wụt mme owo usụn̄ edidianakiet ye ima.” Didie ke mmọ ẹsinam emi? Mme Ntiense ẹfiọk ẹte ke ndikpep nnyụn̄ nda item Bible nsịn ke edinam esin̄wam owo ekịbe ọbọhọ ndiọi edinam. Ntak edi oro mmọ ẹsịnde ukeme ndikpep mbon en̄wen se mmọ ẹkpepde ẹto Bible. Uwetn̄kpọ oro eberi ete ke uwụtn̄kpọ mmọ edi “uwụtn̄kpọ oro, nte eyịghe mîdụhe, oyomde ẹkpebe usọp usọp.”

Kpukpru owo ẹkeme ndidụk mme mbono esop Mme Ntiense Jehovah ndien utan̄ etịbe isidụhe. Ẹnọ fi ufiop ufiop ikot ndika Ufọkmbono Obio Ubọn̄ oro ekperede fi.