“Se Ikpadade Idatesịt Isọk Kpukpru Owo”

TUVALU, ediye idụt ke South Pacific emi enyenede isuo usụkkiet, enyene n̄kpọ nte mme andidụn̄ 10,500. Edi, ke ẹfiọkde ẹte ke Abasi ‘oyom kpukpru owo ẹnyene edinyan̄a, ẹnyụn̄ ẹsịm ifiọk akpanikọ,’ ama ọdọn̄ Mme Ntiense Jehovah ke n̄kann̄kụk oro ndinyene mme n̄wed Bible ke usem mmọ. (1 Timothy 2:4) Emi ekedi n̄kpọ-ata, sia n̄wed ukabadeikọ ndomokiet mîkodụhe ke usem oro. Ke 1979, isụn̄utom Mme Ntiense Jehovah oro akanamde utom ke Tuvalu ama anam n̄kpọ aban̄a n̄kpọ-ata oro. Enye ye n̄wan esie ẹkedụn̄ ye ubon kiet ke n̄kann̄kụk oro, ẹkpep usem oro, ẹnyụn̄ ẹtan̄ mme ikọ Tuvalu nsịtnsịt ẹdọn̄ kiet. Ke 1984, Watchtower Bible and Tract Society of New York, Inc., ama osio n̄wed Afo Emekeme Ndidu Uwem ke Nsinsi ke Paradise ke Isọn̄ ke usem Tuvaluan.

Dr. T. Puapua, akani akpan isụn̄utom ukara Tuvalu, ama ewet leta ndiwụt esịtekọm mban̄a n̄wed Ndidu Uwem ke Nsinsi. Enye ekewet ete: “N̄wed emi edi obufa ye akpan n̄kpọ efen oro ẹdiande ke mme akpan ‘n̄kpọuto’ Tuvalu. Mbufo ẹkpenyene ndikop idatesịt ke udeme oro mbufo ẹnyenede—ata eti udeme ke ndifori uwem eke spirit mme owo ke idụt emi. Ami mmenịm ke akpanikọ nte ke ẹyewet emi ẹsịn ke mbụk Tuvalu ke ebuana ye edimịn̄ mme n̄wed ukpepn̄kpọ. . . . [N̄wed] emi edi se ikpadade idatesịt isọk kpukpru owo.”

Otu ikọ oro akabade n̄wed oro akatan̄de obok ama ada esịm edisio n̄wed ukabadeikọ emi ẹkabarede ikọ ke usem Tuvaluan ẹsịn ke Ikọmbakara ke 1993. Enye ekedi akpa n̄wed ukabadeikọ ke usem oro ke ofụri idụt oro. Ke ndondo emi, Itieutom Esede Aban̄a Usem ke Tuvalu ama ọbọ unyịme ndida enye n̄wet akpa n̄wed ukabadeikọ usem obio mmọ.

Ọtọn̄ọde ke January 1, 1989, ẹmịn̄ nsiondi magazine Enyọn̄-Ukpeme eke ọfiọn̄ ke ọfiọn̄ ke usem Tuvaluan. Edieke edide afo okot magazine emi ke usem efen, ntak mûdụn̄ọkede page 2 unyụn̄ use m̀mê usem emana fo esịne ke otu mme usem emi ẹsiode Enyọn̄-Ukpeme? Nte eyịghe mîdụhe, ndikot enye ke usem emana fo ayada idatesịt efen efen ọsọk fi.