Mme Mbụme Ẹtode Mme Andikot
Sia Jehovah enyịmede ndifen mme idiọkn̄kpọ ebe ke ufọn uwa ufak, ntak ẹyomde mme Christian ẹyarade idiọkn̄kpọ ẹnọ mbiowo esop?
Nte ẹkemede ndikụt ke se iban̄ade David ye Bath-sheba, Jehovah ama efen idiọkn̄kpọ David, okposụkedi okokponde, ke ntak oro David akatuade n̄kpọfiọk ke ofụri esịt. Ke ini prọfet Nathan ekedide ebịne enye, David ama etịn̄ an̄wan̄wa ete: “Mmanam idiọk ido ye Jehovah.”—2 Samuel 12:13.
Nte ededi, Jehovah isinyịmeke ediyarade idiọkn̄kpọ oro anamidiọk ayararede ke ofụri esịt inyụn̄ ifen inọ kpọt edi esinam n̄ko mme ima ima ndutịm ndin̄wam owo oro akanamde idiọkn̄kpọ afiak okop nsọn̄idem eke spirit. Ke eke David, un̄wam ekedi ebe ke prọfet Nathan. Mfịn, mbiowo oro ẹkọride ẹsịm ọyọhọ idaha ke n̄kan̄ eke spirit ẹdu ke esop Christian. Mbet oro James anam an̄wan̄a ete: “Nte owo ọdọn̄ọ [ke n̄kan̄ eke spirit] ke otu mbufo? yak enye okot mbiowo Ufọk Abasi; mmọ ẹnyụn̄ ẹnụhọ ẹfụk enye ẹbọn̄ akam, ẹda aran ẹyet enye ke enyịn̄ Ọbọn̄: ndien akam mbuọtidem ayanyan̄a enye emi ọdọn̄ọde, Ọbọn̄ oyonyụn̄ anam enye adaha ada; ndien edieke enye akanamde idiọk-n̄kpọ, ẹyefen enye.”—James 5:14, 15.
Mbiowo oro ẹnyenede mbufiọk ẹkeme ndinam ekese ndisụhọde ubiak oro anamidiọk oro atuade n̄kpọfiọk okopde. Mmọ ẹdomo ndikpebe Jehovah ke edinam mmọ ye anamidiọk oro. Mmọ idehede iyom nditie nsọn̄ido nsọn̄ido, idem okposụkedi ekemede ndiyom ẹnọ ọkpọsọn̄ ntụnọ. Utu ke oro, mmọ ẹsikere ẹban̄a usọp usọp udọn̄ owo oro ke mbọm. Mmọ ke ime ẹsidomo ndida Ikọ Abasi nnen̄ede ekikere owo oro anamde idiọkn̄kpọ. (Galatia 6:1) Idem ọkpọkọm owo inyịmeke ndiyarade idiọkn̄kpọ esie, esịt ekeme ndisụk nnụk enye nditua n̄kpọfiọk ke ini mbiowo ẹkade ẹbịne enye, ukem nte okonụkde David ke ini Nathan akakade ebịne enye. Ke ntem un̄wam oro mbiowo ẹnọde an̄wam anamidiọk oro ndifep n̄kpọndịk edifiak nnam idiọkn̄kpọ ye ndiọi utịp edikabade ndi anamidiọk oro esịt ama okodoro ufiọn.—Mme Hebrew 10:26-31.
Ke akpanikọ idịghe mmemmem n̄kpọ ndiyarade idiọkn̄kpọ oro owo okopde bụt aban̄a nnọ mbon en̄wen nnyụn̄ nyom edifen nnọ. Emi oyom odudu esịtidem. Nte ededi, kere esisịt ban̄a utịp editre ndiyarade idiọkn̄kpọ. Eren kiet oro okokpude ndiyarade akwa idiọkn̄kpọ esie nnọ mbiowo ke esop ọkọdọhọ ete: “Mma n̄kop ubiak oro mîkenyịmeke ndikụre. Mma nnen̄ede nsịn ifịk ke utom ukwọrọikọ, edi n̄kosụk n̄kokop mfụhọ.” Enye ekekere ke ndiyarade idiọkn̄kpọ oro nnọ Abasi ke akam ama ekem, edi nte an̄wan̄ade oro ikekemke, koro enye ama okop ukem mfụhọ oro Edidem David okokopde. (Psalm 51:8, 11) Etịm ọfọn didie ntem ndinyịme ima ima un̄wam oro Jehovah ọnọde ebe ke mbiowo!