Nte Abasi Esede Mme Akpan̄kpa

N̄KPA owo ima esinen̄ede edi n̄kpọ mfụhọ. Ukpọk ukpọk ekikere, ndobo, ye se ẹtabade ẹsinen̄ede ẹkpon. Editaba owo ima ke n̄kpa ekeme ndinam owo ekere ke imọ inyeneke un̄wam, sia mînamke n̄kpọ m̀mê nso inyene, odudu, m̀mê idaha ke owo enyene, baba owo kiet ke isọn̄ ikemeke ndinam owo oro ama akakpa afiak edidu uwem.

Nte ededi, Andibot nnyịn ese n̄kpọ isio isio. Ke ama akada ntanisọn̄ obot akpa owo, enye n̄ko ekeme ndinam owo oro ama akakpa afiak edidu uwem. Ke ntak emi, Abasi ekeme ndise mme akpan̄kpa nte n̄kpọ eke mmọ ẹsụk ẹdude uwem. Kaban̄a mme anam-akpanikọ asan̄autom eke eset oro ẹkekpan̄ade, Jesus ọkọdọhọ ete: “Kpukpru mmọ ẹdu uwem ẹnọ Enye,” ke nditịn̄ ke usụn̄ efen, kpukpru mmọ ke ẹdu uwem ke ekikere Abasi.—Luke 20:38.

Ke adan̄aemi okodude ke isọn̄, ẹma ẹnọ Jesus odudu ndinam mme akpan̄kpa ẹset. (John 5:21) Ntem, enye ese mbon oro ẹkpan̄ade ke edinam akpanikọ ukem nte Ete esie esede. Ke uwụtn̄kpọ, ke ini ufan esie Lazarus akakpade, Jesus ọkọdọhọ mme mbet esie ete: “Mmọn̄ n̄ka man ndemede enye ke idap.” (John 11:11) Nte owo esede, Lazarus ama akpa, edi nte Jehovah ye Jesus ẹsede, Lazarus ekedede.

Ke idak ukara Obio Ubọn̄ Jesus, “nti owo ye mme idiọk owo ẹyeset ke n̄kpa.” (Utom 24:15) Nte ini akade, mbon oro ẹnamde ẹset ẹyebọ ukpep ẹto Abasi ẹnyụn̄ ẹnyene idotenyịn nsinsi uwem ke isọn̄.—John 5:28, 29.

Ih, n̄kpa owo ima ekeme ndikama ekese mfụhọ ye mmọn̄eyet, oro ekemede ndibịghi ke ediwak isua. Nte ededi, ndise mme akpan̄kpa nte Abasi esede ekeme ndinọ nnyịn akwa ndọn̄esịt ye idotenyịn.—2 Corinth 1:3, 4.