Nte N̄kpọ Esinyene Fi Ndyọ?

NDI ọmọfiọk ke ini mme andiwet Bible ẹtịn̄de ẹban̄a mme utom ye edu Abasi, ke emi esiwak ndinyene mmọ ndyọ? ‘Mmenyene ndyọ,’ ntre ke andiwet psalm ọkọdọhọ. (Psalm 139:14) Prọfet Isaiah ekewet ete: “Jehovah afo edi Abasi mi, nyokpono fi, nyotoro enyịn̄ fo; koro afo anamde mme utịbe n̄kpọ.” (Isaiah 25:1) Mîdịghe kere ban̄a n̄kpaidem ye ndyọ oro ikọ apostle Paul emi owụtde: “Uwak ọniọn̄ ye ifiọk Abasi ẹditụn̄ọ adan̄a didie!”—Rome 11:33.

The Oxford Encyclopedic English Dictionary akabade “ndyọ” nte “nduaidem emi otode n̄kpọ oro owo mîkodorike enyịn, mîmeheke, m̀mê emi owo mîkemeke ndinam an̄wan̄a, akpan akpan n̄kpaidem oro asan̄ade ye ima m̀mê ọkpọsọn̄ udọn̄ ye ntre ntre.”

Nte isidịghe n̄kpọ idatesịt ndikụt nditọwọn̄ ẹmọnọde enyịn ke ntak ndyọ ke ini mmọ ẹkụtde, ẹtụkde, m̀mê ẹkopde n̄kpọ oro edide obufa ọnọ mmọ? Ke mfụhọ, utọ ndyọ oro ọkọn̄ọde ke ọkpọsọn̄ udọn̄ ye mbufa n̄kpọ do esisụhọde nte owo ọkọride.

Nte ededi, amaedi mme andiwet Bible oro ẹkotde ẹto ke enyọn̄ emi, n̄kpọ ndinyene mmọ ndyọ ekedi obot mmọ. N̄kpọ ama esinyene mmọ ndyọ kpukpru ini. Ntak ekedide ntre? Koro mmọ ẹkedade esịtekọm ẹtie ẹkere mme utom Abasi. Andiwet psalm ọkọbọn̄ akam ntem: “Mmowụk ekikere mi ke mme isua eyo oko, ke kpukpru n̄kpọ oro afo akanamde; mmetie n̄kere nte edibotn̄kpọ fo ẹnyenede ndyọ.”—Psalm 143:5, The New English Bible.

Ndikụt nte n̄kpọ enyenede mme andituak ibuot nnọ Abasi eke eyomfịn ndyọ odot itoro didie ntem! Nte n̄kpọ esinyene fi ndyọ? Nte afo ke ọkọri edu oro?