Mme Mbụme Ẹtode Mme Andikot
Ntak emi Jesus oro ẹkenamde eset ọkọdọhọde Thomas otụk imọ ke ini enye mîkayakke Mary Magdalene otụk enye ke mbemiso?
Ndusụk n̄kani edikabade Bible ẹnọ ekikere oro owụtde ke Jesus ọkọdọhọ Mary Magdalene okûtụk imọ. Ke uwụtn̄kpọ, Edisana Ŋwed Abasi Ibom akabade mme ikọ Jesus ntem: “Kûtụk Mi; koro ndọkke kan̄a ntiene Ete.” (John 20:17) Nte ededi, akpasarade ikọedinam Greek oro ẹsiwakde ndikabade ‘tụk,’ ọwọrọ n̄ko “ndisọn̄ọ nyịre, ndisọn̄ọ mmụm n̄kama, ndimụm ubọk ọsọn̄, ndifịk mmụm, ndimụm n̄kama.” Owụt ifiọk ndikere ke Jesus ikakam ikpanke Mary Magdalene nditụk imọ, sia enye ama ayak iban eken oro ẹkedude ke udi “ẹdimụm Enye ukot.”—Matthew 28:9.
Ediwak edikabade Bible eke usem eyomfịn, utọ nte New World Translation of the Holy Scriptures, The New Jerusalem Bible, ye The New English Bible, ẹn̄wam nnyịn ndifiọk se mme ikọ Jesus ẹkenen̄erede ẹwọrọ ke ndikabade mme ikọ esie ntem: “Kûyịre mi ke idem.” Ntak emi Jesus ekpetịn̄de ikọ ntem ye Mary Magdalene, emi ekedide n̄kpet n̄kpet nsan̄a esie?—Luke 8:1-3.
Etie nte Mary Magdalene ekekere ke Jesus ọmọn̄ ọkpọn̄ isọn̄ ọdọk ke heaven. Sia ekenen̄erede ọdọn̄ enye ndidu ye Ọbọn̄ esie, enye ama ọsọn̄ọ omụm Jesus akama, inyụn̄ imaha ndisana enye nyak. Man anam Mary enịm nte ke imọ ididọkke kan̄a ke heaven, Jesus ama ọdọhọ enye okûyịre imọ ke idem, edi akam akasian mme mbet imọ ete ke imọ imeset.—John 20:17.
Edi, nneme oro Jesus ekenyenede ye Thomas ekedi isio. Thomas ikodụhe ke ini Jesus okowụtde ndusụk mbet idem. Nte ini akakade, Thomas ama ọdọhọ ke imọ inịmke ke Jesus ama eset ke n̄kpa, ibọhọke ini imọ ikokụt nde okpukwak ke ubọk Jesus inyụn̄ isịn ubọk imọ ke n̄kan̄ Esie. Ke usen itiaita ẹbede, Jesus ama afiak owụt mme mbet esie idem. Isan̄ enye emi, Thomas ama odu ke otu mmọ, ndien Jesus ama ọdọhọ enye esịn ubọk esie ke mme nde okpukwak oro ẹkekọn̄de imọ.—John 20:24-27.
Ntem, ke ini Jesus ọkọdọhọde Mary Magdalene okûtụk imọ, enye okoyom Mary ọfiọk ke ikenenke enye ndikpan imọ ndidọk n̄ka heaven; edi ke ini Jesus ọkọdọhọde Thomas otụk imọ, enye okoyom ndin̄wam Thomas enịm ke imọ imeset ke n̄kpa. Ke idaha mbiba emi, Jesus ama enyene nti ntak ndinam n̄kpọ ke usụn̄ oro enye akanamde.