“Mmọ Ẹdụk ke Ubom Mbakara Ẹsụhọde ke Inyan̄”
ẸDA mbuaha okpoho ẹbot awat-ubom oro odomode ndiwat ubom esie mbe mbufụt inyan̄, ẹwụk ke esụkmbehe Gloucester ke Massachusetts ke United States. Ẹda mbiet emi ẹti ediwak tọsịn mme ọkọiyak obio Gloucester oro ẹkekpan̄ade ke inyan̄. Ẹwet ikọ Psalm 107:23, 24 ke ukot mbiet oro ye ke itiat oro ẹwụkde ẹkpere. Itien̄wed oro okot ete: “Mmọ ẹdụk ke ubom mbakara ẹsụhọde ke inyan̄, ẹnam utom ke akwa mmọn̄: mmọ oro ẹkụt se Jehovah anamde, ye n̄kpọ ndyọ esie ke inyan̄ ibom.”
Ndikọ n̄kpọ ke inyan̄ Atlantic edi ata enyene-ndịk utom. Ẹdọhọ ke n̄kpọ nte owo 5,368 ke Gloucester ẹmekpan̄a ke ini ẹkekọde n̄kpọ ke inyan̄ ke mme isua emi ẹbede. Idahaemi, n̄kpọ nte owo 30,000 ẹdụn̄ ke Gloucester. Ẹwet ke itiat editi oro ẹte: “Idiọk oyobio ye ọkpọsọn̄ mbufụt mmọn̄ ẹtode ufọt edem edere ye edem usiahautịn ẹkewot ndusụk mmọ. Ke ini mbon eken ẹkekpan̄ade ke awat-ikpọn̄ ubom oro okotụnde usụn̄ ọkpọn̄ nsụn̄ikan̄ oro akadade mmọ ọwọrọ akpa. Oyobio ama esịp ndusụk nsụn̄ikan̄, ke ini mbon eken ẹkewatde ẹketọ ikpọ nsụn̄ikan̄.”
Itiat editi emi anam owo eti akama-mmọn̄eyet ufen ye n̄kpọndịk oro mme ọkọiyak ẹsobode ke ediwak isua ikie idahaemi. Kere ban̄a eyet oro ibanndọ, nditọ, nditọeka, ye mme ete ye eka ẹtuan̄ade ke ntak n̄kpa mbonima mmọ. Edi, Jehovah Abasi ifreke mme ebeakpa, ye nditọakpa, m̀mê mbon oro ẹkpan̄ade ke inyan̄. Apostle John ama etịn̄ aban̄a se iditịbede ke ini iso, ete: “Inyan̄ asana mme akpan̄kpa oro ẹdude mmọ ke esịt ayak, n̄kpa ye Hades ẹnyụn̄ ẹsana mme akpan̄kpa emi ẹdude mmọ ke esịt ẹyak.” (Ediyarade 20:13) Ke akpanikọ, ke ini ẹdinamde mmọ ẹset, mbon oro ‘ẹkedụkde ke ubom mbakara ẹsụhọde ke inyan̄’ ẹyekụt n̄kpọ ndyọ oro “Jehovah anamde.”