Mbuọtidem Esie Esịn Udọn̄ Ọnọ Mbon En̄wen
KE INI Silvia akamanade ke December 1992, enye eketie nte ekpri eyenan̄wan emi idem ọsọn̄de etieti. Edi ke ini Silvia ekedide isua iba, ẹma ẹdifiọk ke enye enyene idiọk udọn̄ọ emi mînyeneke usọbọ, oro esinamde ọsọn̄ owo ndikot ibifịk, mîsinyụn̄ iyakke udia ataha owo ke idịbi. Ke ntak udọn̄ọ emi, Silvia esimen n̄kpasịp ibọk 36 kpukpru usen, okot ibọk ke ibuo, ẹsinyụn̄ ẹnuak enye idem. Sia enye enyenede mfịna ke obufre, enye esinyene ndikọn̄ọ n̄kpọ uda n̄kot ibifịk, idem ke ini enye akade n̄kpọ.
Teresa eka esie ọdọhọ ete: “Nte ededi, akpa owo idem ndikụt nte Silvia ọyọde udọn̄ọ emi. Ifiọk N̄wed Abasi oro enye enyenede anam enye enyene ọkpọsọn̄ mbuọtidem. Mbuọtidem emi an̄wam enye ọyọ mfụhọ ye ubiak esie. Kpukpru ini enye esiti un̄wọn̄ọ Jehovah aban̄ade obufa ererimbot, ini oro ẹdinamde kpukpru mbon udọn̄ọ ẹkop nsọn̄idem.” (Ediyarade 21:4) Ndusụk ini oro udọn̄ọ Silvia esinamde ubon mmọ ẹfụhọ, imam esie oro esiwụtde mbuọtidem esie esisọn̄ọ mmọ idem. Enye esisian ete ye eka esie ọkọrọ ye eyeneka esie eren ete: “Ndutụhọ oro ibọde idahaemi imenke udomo ye uwem oro ididude ke obufa ererimbot.”
Silvia esibuana eti mbụk Ikọ Abasi ye mbon en̄wen kpukpru ini, ndien mbon oro enye esibuanade eti mbụk ẹsikụt nte iso esie ayamade ke ntak idatesịt. Esinen̄ede enem mbon esop mmọ ke Isuo Canary ndikụt nnyụn̄ n̄kop nte enye etienede ọbọrọ mbụme ke mme mbono esop. Silvia esima ndituak nda ke mbono esop asuanade nneme nneme ye nditọete esie eke spirit. Ufan ufan ye idara idara edu esie ẹnam kpukpru owo ke esop ẹma enye.
Antonio ete esie ọdọhọ ete: “Silvia ekpep nnyịn ata akpan n̄kpọ, oro edi ke uwem edi enọ Abasi, ntre nnyịn ikpenyene ndiwụt esịtekọm mban̄a uwem idem ke ini inyenede mfịna.” Ukem nte Silvia, kpukpru mme asan̄autom Abasi—n̄kpri ye ikpọ—ẹnen̄ede ẹtie ẹbet ini oro ‘andidụn̄ mîdidọhọke ite, Ndọdọn̄ọ.’—Isaiah 33:24.
[Ndise ke page 31]
Silvia ke okot Bible ọnọ owo ke adan̄aemi eka esie ọkọn̄ọde n̄kpọ emi Silvia esidade okot ibifịk