Nte Ikpenyene Ndikop Ndịk Mban̄a Edidi Christ?
AFO ekere ke edidi Jesus Christ editie didie? Ndi ekere ke enye edida ubiomikpe, nsobo, ye ufen ọsọk ubonowo? Mîdịghe, ndi omodori enyịn enye ndidi nditre kpukpru mfịna oro isobode? Nte ikpenyene ndikop ndịk mban̄a edidi Christ? Mîdịghe, nte ikpakam itetie ibet enye?
Bible etịn̄ ntem aban̄a edidi Christ ete: “Sese! Enye ọmọn̄ asan̄a ke obubịt enyọn̄ edi, ndien kpukpru enyịn ẹyekụt enye, . . . ndien kpukpru mme esien isọn̄ ẹyeyịbi idem mmọ ke mfụhọ ẹban̄a enye.” (Ediyarade 1:7) Edidi emi aban̄a Jesus ndidi ke ini iso ndinọ ndinen owo utịp nnyụn̄ mmia mme idiọkowo ufen.
Apostle John akakam etetie ebet edidi Christ, utu ke ndikokop ndịk mban̄a enye. Ke John ama ọkọbọ ediyarade aban̄ade edidi Christ ye se oro edinamde ọnọ isọn̄, enye ama ọbọn̄ akam ke ofụri esịt ete: “Di, Ọbọn̄ Jesus.” (Ediyarade 22:20) Edi ntak emi “kpukpru mme esien isọn̄ [ẹdiyịbide] idem mmọ ke mfụhọ ẹban̄a enye”? Didie ke “kpukpru enyịn” ẹdikụt enye? Nso ke Christ edinam ke ama edi? Didie ke ndibuọt idem ke edidi Christ ekeme ndinyene ufọn nnọ nnyịn? Ibuotikọ oro etienede ọyọbọrọ mme mbụme emi.