“Mbọk Ẹbọ Ekpri Ẹnọ Emi”

ẸKEWET ikọ emi ke leta oro n̄kọk itieutom Mme Ntiense Jehovah ke Russia ọkọbọde. Leta emi akasan̄a ye akwa ekebe oro ẹkedọn̄de sọks oro ẹdọkde-dọk.

Alla, kiet ke otu Mme Ntiense Jehovah emi edide isua 67, emi odude ke esop kiet ke Far East ke Russia ọkọnọ enọ emi. Alla anam n̄kpọ Jehovah idahaemi ke se ibede isua duop onyụn̄ esịn ifịk ọkwọrọ eti mbụk Obio Ubọn̄. Nte ededi, enye ama ọduọ akpauben̄ ke mbuari. Edi ima ama anam Alla ekpebe edu Dorcas, Christian an̄wan ke akpa isua ikie, emi ekesikịmde ọfọn̄ ọnọ ekemmọ mme andinịm ke akpanikọ.—Utom 9:36, 39.

Alla ekewet ke leta esie ete: “N̄kemeke ndimenede ukot, edi mmekeme ndimenede ubọk. Ntre nsida leta n̄kwọrọ ikọ.” Enye ama adian do ete: “N̄kọdọhọ sia nsụk n̄kemede ndimenede ubọk, ke nyọdọk sọks ifan̄. Nyom ẹda sọks emi ẹnọ nditọete oro ẹdibọpde Ufọkmbono Obio Ubọn̄ ke mme ebiet oro ẹbịtde etieti, utọ nte Far East ke Russia ye Siberia.”

Jesus Christ eketịn̄ ntem aban̄a ata mme anditiene enye: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Orụk ima oro Alla enyenede mi ke ẹda ẹfiọk ata mbet Jesus.