Ke Ẹyom Ibọrọ

“Ke ima ikenyene okụk ndida nse mban̄a uwem ye ubon nnyịn, inyụn̄ inyene se inamde uwem enem akan nte ekenemde ke eset—utọ nte n̄kpọ unam ufọk ebịt, nti n̄kpọmbre, ndinem mfri kpukpru ini ke isua—nnyịn isụk inyene ndikere ‘ntak’ emi idude uwem. Ntak emi mme owo ẹmiade mbuba-a? Ufọn-ọ?”—David G. Myers, prọfesọ oro ekpepde n̄kpọ aban̄a ekikere ke Hope College, Holland, Michigan, U.S.A.

DIDIE ke afo ọkpọbọrọ mbụme prọfesọ emi? Ndusụk owo ẹkeme ndikere m̀mê ufọn akam odu ndibiat ini nyom ibọrọ. Edi afo nditre ndiyom ibọrọ utọ mbụme oro ekpetie nte ndiyak n̄kwaitiat esịne ke ikpaukot fo—edisụk asasan̄a, edi udukopke inem isan̄ oro.

Edieke edide akanam afo emekere se inen̄erede idi uduak uwem, ediwak owo ẹsikere n̄ko. Nte otu mme anam-ndụn̄ọde kiet ẹdọhọde, kiet ke otu n̄kponn̄kan ndụn̄ọde oro ẹnamde ẹban̄a owo owụt nte ke ata ediwak owo ke ẹkere ẹban̄a “se uwem ọwọrọde ye uduak uwem.”

Edieke afo oyomde esịt enen̄ede ana fi sụn̄, ana afo oyom ibọrọ ikpọ mbụme ita emi.

Nnyịn ikoto m̀mọ̀n̄?

Nso idi uduak uwem?

Nso iditịbe ke ini iso?

M̀mọ̀n̄ ke afo ekeme ndinyene ibọrọ oro ẹkemede ndiberi edem nnọ mme akpan mbụme emi? Utu ke nditịn̄ se mme owo ẹkerede, ẹmọn̄ ẹda Ikọ Abasi, kpa Bible, ẹbọrọ mme mbụme emi ke ibuotikọ ifan̄ oro ẹtienede mi. Nnyịn idọhọ fi okụbọde Bible fo onyụn̄ ese se enye etịn̄de.