Ndida Ikike N̄kọk Mfịna

N̄KPARAWA ita ke Ufọt Ufọt Africa ẹkeyom ndika n̄kodụk mbono district ke ebiet kiet ke idụt mmọ. Mmọ ẹdisan̄a didie ẹkesịm do? Itie mbono ekedi n̄kpọ nte kilomita 90, usụn̄ ọdiọk, etie ntọn̄ ntọn̄, mmọ inyụn̄ inyeneke n̄kpọisan̄. Mmọ ẹma ẹka ndiben̄e owo enan̄ukwak ita edi ikekwe emi ẹfọnde.

Ebiowo kiet ama okụt mfịna mmọ onyụn̄ ọnọ mmọ akani enan̄ukwak esie emi okosụk ọfọnde. Enye ama asian mmọ nte imọ ye mbon eken ikesisan̄ade ikesịm itie mbono. Ebiowo oro ama ọnọ ekikere ete mmọ mbita ẹwat enan̄ukwak kiet. Emi ikọsọn̄ke, edi ama oyom mmọ ẹnam eti ndutịm. Edi owo ita ẹdiwat didie enan̄ukwak kiet?

Sia mmọ mîkoyomke eyo amia mmimọ, n̄kparawa ita emi ẹma ẹbabak ẹsobo ke usenubọk ẹtan̄ mbiomo mmọ ẹbọp ke enan̄ukwak. Akpa owo ama awat ebe iso, owo iba eken ẹsọp ẹsan̄a ke ukot ẹtiene enye. Ke ama akawat n̄kpọ nte mbahade kilomita kiet enye ama atuak ada onyụn̄ eberi enan̄ukwak ke eto. Enye ekeberi enan̄ukwak ke ebiet emi owo iba eken ẹkemede ndida n̄kụt mbak owo edimen, ekem enye ọtọn̄ọ ndisasan̄a.

Ke ini owo iba eken ẹdide ẹdisịm ọtọ enan̄ukwak oro, kiet ke otu mmọ ama emen awat, ndien ọyọhọ owo ita aka iso asan̄a ke ukot ke n̄kpọ nte mbahade kilomita en̄wen mbemiso awatde esiemmọ. Ntre, eti ndutịm emi ye ubiere mmọ ẹma ẹnam mmọ ẹsan̄a n̄kpọ nte kilomita 60 ke ukot utu ke ndisan̄a n̄kpọ nte kilomita 90. Ukeme oro mmọ ẹkesịnde ama odot. Mmọ ẹma ẹsop idem ye nditọete mmọ ke mbono oro ẹnyụn̄ ẹdia udia eke spirit. (Deut. 31:12) Nte afo eyesịn ofụri ukeme man odụk mbono district ke edem mbufo isua emi?