Ndi Ama Ọfiọk?

Ndi ibibene oro apostle Paul eketịn̄de aban̄a ke Ephesus 2:11-15 ekedi ata ibibene oro akabaharede mme Jew ye mme Gentile?

Ke ini apostle Paul ekewetde leta emi ọnọ ẹsọk mbon Ephesus, enye ama owụt nte nditọ Israel ẹkekpụhọrede ye “isenowo.” Enye ọkọdọhọ ke “ibibene” ama odu emi ‘akabaharede’ otu mbiba emi. (Ephesus 2:11-15) Paul eketịn̄ aban̄a “Ibet ewụhọ” oro ẹkedade Moses ẹnọ. Edi ekeme ndidi enye nditịn̄ mban̄a “ibibene” ama anam mbon oro ẹkekotde leta esie ẹti ibibene itiat oro okodude ke temple.

Ke akpa isua ikie E.N., temple Jehovah oro okodude ke Jerusalem ama enyene ediwak okụre emi ibat ibat owo kpọt ẹkesidụkde. Owo ekededi ama ekeme ndidụk Okụre Mme Gentile, edi mme Jew ye mbon oro ẹkekponode Abasi ke ido mme Jew kpọt ẹkesidụk mme okụre eken. Akamba ibibene oro ẹkotde Soreg, emi ẹdọhọde ke okokon̄ n̄kpọ nte mita kiet ye ubak akabaharede mme okụre eken ke temple ye Okụre Mme Gentile. Flavius Josephus, eyen Jew emi ekedide ewetmbụk ke akpa isua ikie, ọkọdọhọ ke ẹkeda usem Greek ye Latin ẹwet n̄kpọ ẹdian ke ibibene emi, ẹdụri mme Gentile utọn̄ ẹte ẹkûdụk edisana ebiet.

Ẹkụt ikọ oro ẹkewetde ke usem Greek ke ibibene oro akabaharede Okụre Mme Gentile ye mme okụre eken. Enye okot ete: “Yak esenowo ndomokiet okûbe ibibene oro ẹsịnde ẹkanade edisana ebiet. Owo ekededi oro ẹdimụmde, iyịp esie edikọbọ enye.”

Ana in̄wan̄-in̄wan̄ nte ke Paul akada Ibet ediomi Moses, emi akabaharede mme Jew ye mme Gentile ke anyan ini, odomo ye ibibene Soreg, emi akabaharede Okụre Mme Gentile ye mme okụre eken. N̄kpa uwa Jesus ama abiat Ibet ediomi efep onyụn̄ “owụri ibibene oro okodude ke ufọt” mme Jew ye mme Gentile.

Ntak emi ẹsiwakde nditịn̄ mban̄a esien Israel 12 ke ini edide esien 13 ẹkedu?

Ubon Jacob oro ẹkekpụhọde enyịn̄ ẹkot Israel ẹkenam esien Israel. Ete-ekpụk emi ekenyene nditọ iren duopeba—Reuben, Simeon, Levi, Judah, Dan, Naphtali, Gad, Asher, Issachar, Zebulun, Joseph, ye Benjamin. (Genesis 29:32–30:24; 35:16-18) Duopekiet ke otu mmọ ẹma ẹnyene esien oro ẹkekotde ẹdian mmọ, edi owo ikokotke esien ndomokiet idian Joseph. Utu ke oro, ẹkekot esien iba ẹdian nditọ esie, Ephraim ye Manasseh, emi ẹkedade nte mme ibuot ekpụk. Ntre, ibat esien Israel ẹkedi 13. Ntak emi Bible esitịn̄de aban̄a esien 12?

Ẹma ẹmek iren emi ẹketode esien Levi ndinam utom ke ataya Jehovah, ndien ekem ẹnam ke temple. Ntem, owo ikayakke mmọ ẹdụk ekọn̄. Jehovah ọkọdọhọ Moses ete: “Edi kûbat esien Levi, kûnyụn̄ uda ibat mmọ usịn ke otu nditọ Israel. Edi nịm mme Levite ete ẹkama ebiet-idụn̄ n̄kpọ-ntiense, ye kpukpru n̄kpọ unam utom esie, ye kpukpru se inyenede enye.”—Numbers 1:49, 50.

Owo ikọnọhọ nditọ Levi isọn̄ ke Isọn̄ Un̄wọn̄ọ. Utu ke oro, ẹkenọ mmọ obio 48 emi ẹkedude ke nsio nsio ikpehe ke Israel.—Numbers 18:20-24; Joshua 21:41.

Ntak iba emi ẹkenam owo iwakke ndisiak esien Levi ke ini ẹkebatde esien Israel. Ntem, ẹkesiwak ndibat esien 12 ke Israel.—Numbers 1:1-15.

[Ebiet Ẹdade Ndise Ẹto ke page 21]

Archaeological Museum of Istanbul