San̄a Kpere Abasi
Jehovah Enen̄ede Ama Mbon Nsụhọdeidem
MFỊN, mbon oro ẹdide n̄kpọ ke ererimbot ẹsiwak nditan̄ idem, ẹfịbe ufụp, ẹnyụn̄ ẹyom ikpọ itie. Edi, ndi mme ẹdu emi ẹkeme ndinam owo asan̄a ekpere Jehovah Abasi? Baba! Jehovah oyom mbon oro ẹtuakde ibuot ẹnọ imọ ẹsụhọde idem. Se ẹwetde ke Numbers ibuot 12 owụt ke emi edi akpanikọ. Se iyomde ndineme emi eketịbe ke wilderness Sinai, ke nditọ Israel ẹma ẹkewọrọ ke ufụn Egypt.
Numbers 12:1 ọdọhọ ke Miriam ye Aaron emi ẹdide ikpọ nditọeka Moses ẹma ẹtọn̄ọ ‘ndisụk Moses uyo.’ Utu ke nditịn̄ mfịna mmọ nnọ Moses, mmọ ẹkekam ẹkesụk enye uyo ke otu nditọ Israel. Etie nte Miriam emi ẹbemde iso ẹsiak ke ufan̄ikọ emi ọkọtọn̄ọ nsụkuyo emi. Ntak kiet oro mmọ ẹkenamde emi ekedi koro Moses ọkọdọ n̄wan Cush. Ndi Miriam ekefịbe ke ẹmọn̄ ẹkpono n̄wan Cush emi mîkedịghe eyen Israel ẹkan imọ?
Odu n̄kpọ en̄wen oro akanamde mmọ ẹsụk Moses uyo. Miriam ye Aaron ẹkedọhọ ẹte: “Nte ye Moses ikpọn̄ ke Jehovah osụk ọdọhọ? Nte enye idọhọke ye nnyịn n̄ko?” (Ufan̄ikọ 2) Ndi uyom ikpọ itie ye ukpono ekenen̄ede anam mmọ ẹsụk Moses uyo?
Mbụk oro owụt ke Moses ikọbọrọke mmọ. Enye ikọdọn̄ke utọn̄ ke se mmọ ẹketịn̄de, edi ama aka iso ọyọ mmọ. Emi ọsọn̄ọ se Bible etịn̄de, ke Moses ekenen̄ede edi “ata sụn̄sụn̄ owo, akan kpukpru owo” emi ẹdude ke isọn̄.a (Ufan̄ikọ 3) Ikanaha Moses etịn̄ ọnọ mmọ ntak emi Jehovah emekde imọ nte adausụn̄. Jehovah ama okop nsụkuyo mmọ, ndien enye akada ye Moses.
Jehovah akada nte ke mmọ ẹsụk imọ uyo, sia edide enye ekemek Moses. Jehovah ama asua ọnọ mmọ, onyụn̄ eti mmọ ke Moses edi san̄asan̄a owo imọ, ete: “Nneme ye enye ke inua ke inua.” Ekem Jehovah ọdọhọ Miriam ye Aaron ete: “Mbufo ẹnam nan̄a didie mîfeheke ndisụk . . . Moses uyo?” (Ufan̄ikọ 8) Ndikosụk Moses uyo ekedi ndisụk Abasi uyo. Sia mmọ ẹkemiomde Abasi ntre, akana iyatesịt Abasi esịm mmọ.
Ẹma ẹtọ Miriam akpamfia sia etie nte enye ọkọtọn̄ọ nsụkuyo oro. Aaron ama ọsọsọp ekpe Moses ubọk ete ekpe Abasi ubọk ọnọ Miriam. Omokụt do ke Moses oro mmọ ẹkesụkde uyo ke ẹdidọhọ idahaemi ẹte ekpe Abasi ubọk man idem ọsọn̄ Miriam! Moses ama osụhọde idem anam se ẹkedọhọde enye anam. Ndien akpa ini emi enye osiorode uyo ke mbụk emi, edi emi enye ekpede Jehovah ubọk ọnọ Miriam. Jehovah ama anam idem ọsọn̄ Miriam, edi nso esuene ke ekedi ntem ndisio enye n̄kenịm ke edem nna ke usen itiaba!
Mbụk emi anam ifiọk mme edu oro Jehovah enen̄erede ama ye mbon oro enye mîmaha. Edieke ifiọkde ke imenyene ọkpọkọm ata esisịt ntan̄idem, ufụp ye edu uyom ikpọ itie, ana idomo nditre mmọ edieke iyomde ndisan̄a n̄kpere Abasi. Jehovah ama mbon nsụhọdeidem, onyụn̄ ọn̄wọn̄ọ ete: “Mbon nsụkidem ẹyeda isọn̄ ẹnyene; ediwak emem oyonyụn̄ enem mmọ esịt.”—Psalm 37:11; James 4:6.
[Ikọ Idakisọn̄]
a Nsụhọdeidem edi edu oro esinamde owo ọyọ ufịk ye unana ndiyom ndisio usiene.