Ata Akpan Ntịn̄nnịm Ikọ

“Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”—MATTHEW 24:14.

MME ekpep n̄kpọ mban̄a Bible ẹnyịme ke itien̄wed emi edi akpan itien̄wed. Se inamde enye edi akpan itien̄wed edi koro enye etịn̄ aban̄a utom emi ẹnyenede ndinam ke ofụri ererimbot. Ntak en̄wen edi koro enye owụt se mme Christian ẹkpenamde, oro edi, ndikwọrọ mban̄a ata akpan n̄kpọ oro Jesus okokotde “utịt,” mbemiso utịt emi edide.

Ntịn̄nnịm ikọ emi osu mfịn. Enye ebehe fi, sia ẹda eti mbụk emi ẹkot mme owo ẹnyụn̄ ẹdụri mmọ utọn̄. Enye ọnọ fi ifet ndida nnọ Obio Ubọn̄ Abasi m̀mê ndibiọn̄ọ enye. Se emekde edibiere m̀mê oyodu uwem m̀mê ududụhe.

Kop se mme ufan̄ikọ eken ke Matthew 24 aban̄ade mi. Esisịt ini mbemiso ẹwotde Jesus, mme mbet esie ẹma ẹdibụp enye n̄kpọ ẹban̄a ini iso. Mmọ ẹkeyom ndidiọn̄ọ nte ẹdiwụkde Obio Ubọn̄ Abasi emi Jesus ekesiwakde nditịn̄ mban̄a, nnyụn̄ mfiọk n̄ko “akpatre ini editịm n̄kpọ emi,” m̀mê “utịt ererimbot,” nte ẹsịnde ke ndusụk Bible.—Matthew 24:3, American Standard Version; King James Version.

Jesus ama ọdọhọ mmọ ke ẹyen̄wana ikpọ ekọn̄, ke akan̄ ye ndiọi udọn̄ọ ye ikpọ unyekisọn̄ ẹyedu. N̄ko ke ubiatibet ọyọtọt, ke nsunsu mme adausụn̄ ẹyetụn ediwak owo usụn̄, ndien ke ẹyesua ẹnyụn̄ ẹkọbọ ata mme Christian. Kpukpru emi ikedịghe eti mbụk.—Matthew 24:4-13; Luke 21:11.

Edi Jesus ama etịn̄ eti mbụk n̄ko, oro edi, ikọ itien̄wed emi ẹdade ibuotikọ emi ẹto, kpa ikọ emi ọnọde ediwak owo idotenyịn, anamde mmọ ẹkere n̄kpọ ẹnyụn̄ ẹnam n̄kpọ ke ata ediwak isua idahaemi. Okposụkedi emi mme owo ẹnyịmede ke se Jesus eketịn̄de emi edi akpan n̄kpọ, mmọ ẹnyene nsio nsio ekikere ẹban̄a se ikọ esie emi ọwọrọde. Nso ke eti mbụk emi ededi? Nso ke Obio Ubọn̄ emi edi? Ini ewe ke ntịn̄nnịm ikọ emi edisu, ndien ke idem mmanie? Nso idi utịt? Ẹyak ise ise.

[Ndise ke page 2, 3]

Uwetn̄kpọ Gospel inan̄ eke Washington. Matthew 24:14 ke ẹwet oro ke ndodobi ubọkn̄wed

[Ebiet ẹdade n̄kpọ ẹto]

Ẹda ẹto n̄wed oro Facsimile of the Washington Manuscript of the Four Gospels in the Freer Collection 1912