Leta Norway

Ndika Akwa Wilderness Emi Edide Snow Snow

INI snow edi emi; ntre usenubọk emi, nnyịn itop enyịn ke window ndise nte enyọn̄ etiede. Esịt enem nnyịn etieti ndikụt nte enyọn̄ an̄wan̄ade. Nnyịn iyom ndika n̄kọkwọrọ ikọ usen ita ke Finnmarksvidda—akamba unaisọn̄ obot emi odude ke Edem Edere ererimbot.

Ini snow esibit etieti ke Norway, ntre ekpri ndịk anam nnyịn ndika wilderness emi. Edi esịt enem nnyịn sia iyomde ndisan̄a ye Mme Ntiense Jehovah ita emi ẹdụn̄de do. Mmọ ẹdiọn̄ọ nte n̄kan̄ oro etiede ẹnyụn̄ ẹteme nnyịn se ikpanamde.

Usụn̄ iwakke mi. Ndien n̄kukụre usụn̄ ndisịm mbon emi ẹdụn̄de ke ata esịt esịt wilderness emi edi ndisan̄a ke ubomisọn̄ snow. Imatan̄ ọfọn̄, udia ye aranaikan̄ idọn̄ ke ubomisọn̄ snow nnyịn. Nnyịn imada ikụt akamba unaisọn̄ obot ke iso inyụn̄ ikụt nte snow esemde nte daimon ke un̄wana utịn. Eye etieti ndida n̄kụt n̄kpọ emi.

Edop, okoyo, ebet, ebuaikọt, ye mme unam eken ẹwak etieti ke Finnmarksvidda; bear ẹdu n̄ko edi mmọ iwakke. Se ikam inemde nnyịn esịt ikan edi nte iyomde ndikọkwọrọ ikọ nnọ mme owo ke esịt esịt wilderness emi. Nnyịn imenen̄ede iyom ndikụt ndusụk mbon emi ẹsemde usem Sami, emi ẹsibọkde edop m̀mê ẹnamde utom ke mme ufọk enyọn̄ obot.

Ke an̄wa akpa ufọk emi ikụtde ke obot emi, ediwak nditọ ufọkn̄wed ke ẹbre mbre ke snow ye ekemmọ nditọ ufọkn̄wed. Mmọ ẹtre mbre kan̄a, ẹneme nneme ye nnyịn ẹnyụn̄ ẹbụp nnyịn se nnyịn inamde. Akam enenem nnyịn nditịn̄ nnọ mmọ. Nte iyomde ndibe do, owo kiet ke otu mmọ ọdọhọ nnyịn ete: “Ẹtịm ẹkwọrọ-o!” Imafiak idụk ubomisọn̄ snow nnyịn, ndien isan̄ emi iwat ibe akamba akpammọn̄ emi ama ọkọsọn̄ akabade ice ye akamba unaisọn̄. Ndi nnyịn idisụk ikwe mme edop?

Ete kiet ọkọm nnyịn ata inem inem ke ini iwatde ikodụk ekpri ufọk esie. Enye edi kiet ke otu owo ifan̄ emi ẹdụn̄de-dụn̄ mi. Ke ini enye okụtde ke n̄kpọ udọn̄ mbiomo ubomisọn̄ nnyịn abiara, enye an̄wam nnyịn ọdiọn̄. Enye osụhọde idem anam emi, sia mbon n̄kan̄ emi isinamke n̄kpọ itọk itọk. Nte enye anamde n̄kpọ emi anam ikop inem; ikûfehe ndịk. Nnyịn imọkọm enye ke enye ama ọkọdiọn̄ n̄kpọ emi ama, ekem ida Bible inam enye ọfiọk ntak emi Abasi ayakde mme owo ẹbọ ufen. Enye enen̄ede akpan̄ utọn̄ ekem ọbọ n̄wed Nso ke Bible Enen̄ede Ekpep? afiak ọbọ Enyọn̄-Ukpeme ye Awake! Ekem enye atuak inua imam onyụn̄ ọdọhọ ete: “Ẹmenam etieti ke ndidi ndise mi.”

Ke ima ikọkwọrọ ikọ inọ owo ifan̄ en̄wen, eyo ọtọn̄ọ ndikụt ndien imọtọn̄ọ isan̄ unyọn̄. Edi itiwọn̄ọde enyịn, se ebuaikọt ko. Ndatndat idet esie eye etieti ke snow. Ebua emi atuak ada ese nnyịn ekem ọtọn̄ọ isan̄. Nte isụk isan̄ade ika, snow ọtọn̄ọ ndidep tutu nnyịn ikemeke ndikụt ebiet emi ikade. Edi esịt enen̄ede enem nnyịn ke ini idade ikụt ekpri ufọk nnyịn. Nnyịn imabara ikan̄, ndien sụn̄sụn̄ ufọk emi ọtọn̄ọ ndifiop. Okposụkedi emi ikpade mba ọkpọsọn̄ uwat ke snow, imokop inemesịt etieti.

Eyo ọsọsọp esiere, ndien nnyịn ifiak idọn̄ mbiomo ke ubomisọn̄ snow nnyịn iwat isụhọde ika unaisọn̄ kiet, ekem iwat ke isọn̄ akpa emi ama akakabade ice idisịm ufọk kiet en̄wen ke obot. Mi ke ikụt akparawa kiet, ntre nnyịn ida Bible ineme ikọ Abasi ye enye. Akparawa emi ọfọn ido ye nnyịn onyụn̄ owụt nnyịn ebiet emi ekperede akan ndiwat n̄wọrọ usụn̄.

Eyo afiak esiere, ndien mfịn edi akpatre usen ukwọrọikọ nnyịn mi. Imodụk Stabbursdalen National Park; ebiet emi eye etieti. Imada ikụt ikpọ obot emi snow ẹfụkde nte ẹsemde ke un̄wana utịn. Itifiak iwọn̄ọde enyịn, sese ediwak edop ẹsan̄ade ke otu, ke ẹta mbiet, ndusụk ke ẹda ikpat ẹdọk snow ẹyom mbiet se ẹtade. Nnyịn imada n̄ko ikụt owo kiet emi esemde usem Sami etiede ke ubomisọn̄ snow. Enye ke ekpeme mme edop esie. Enye enyene ebua emi etienede enye ekpeme mme edop emi, mînyụn̄ iyakke mmọ ẹsuana. Ebua emi atuak ada ese nnyịn ekem aka iso ke utom esie. Nnyịn imọkwọrọ ikọ inọ ete emi. Enye adara nnyịn onyụn̄ akpan̄ utọn̄ ọnọ nnyịn.

Nte iwatde inyọn̄, ke ikere iban̄a mbon oro ikosobode ke isan̄ emi akadade n̄kpọ nte kilomita 300 mi. Nnyịn imenen̄ede ikop inemesịt nte iketienede ikọkwọrọ ikọ inọ mbon akwa wilderness emi edide snow snow mi!

[Ebiet Ẹdade Ndise Ẹto ke page 15]

© Stamp Norway