Leta Greece

Imadaha Ukwọrọikọ ke Ata Usụk Usụk Europe

IMAWAT sụn̄sụn̄ ke ubom idian̄ade ikpọn̄ ikpọ Obot Levká ke isuo Crete ika ekpri isuo emi odude ke Inyan̄ Mediterranean. Nnyịn owo 13 isịne ke ubom emi. Iwat ika ndikwọrọ ikọ ke isuo Gavdos emi odude ke ata usụk usụk Europe.

Inyan̄ ana sụn̄, ndien eyo emi adade anam ikere ke isan̄ emi edisụk inem ntem. Edi ibịghike-bịghi, ofụm ofụme tutu akpa etịmede onyụn̄ otohode ubom nte owo otop nsa. Udọn̄ọ omụm mi uken̄, anam nti se Bible obụkde aban̄a apostle Paul emi oyobio ekesịmde ke akpa emi ediwak isua ikie ke edem. Ẹkesikot isuo emi Cauda ini oro. (Utom 27:13-17) N̄kosụk mbọn̄ akam nte Abasi emen nnyịn ye uwem ekesịm isuo Gavdos.

Ke akpatre, imada ikụt isuo Gavdos, emi etiede itiat itiat ye obot obot. Unaisọn̄ onyụn̄ odu, edi obot emi odude okon̄ n̄kpọ nte mita 300. Eto ofụm ye ọtọwọk ikọt ẹyọyọhọ isuo emi edide n̄kpọ nte kilomita 26 mi. Ke ndusụk ebiet, eto juniper ẹtetịbe tutu ke mmọn̄.

Ama odu ini emi mme andidụn̄ isuo emi ẹkewakde ẹkpere owo 8,000. Edi idahaemi, mme andidụn̄ isuo emi isịmke owo 40. Etie nte ntatenyịn isịmke kan̄a isuo emi. Okposụkedi emi mme awat nsụn̄ikan̄ ye mme awatinyan̄ eken ẹsiwakde ndiwat mbe mi, mme owo isisọpke iwat ito Crete idi mi. Ndien ndusụk ini oro mme awatinyan̄ ẹkpenyụn̄ ẹwatde ẹdi mi, idiọk enyọn̄ isiyakke.

Idi ndikwọrọ etop emi edinọde mme andidụn̄ Isuo Gavdos inemesịt. Etop emi ayanam mmọ ẹfiọk ke n̄kpọ ọyọfọn ke ini iso, ye nte ke mme owo ẹyedu uwem ke nsinsi inyụn̄ idọn̄ọke aba. Nte isụk iyomde ndibehe, enen̄ede ọdọn̄ nnyịn ndiwọrọ ke ubom man itọn̄ọ ndikwọrọ eti mbụk emi.

Ke oyobio ama okotohode nnyịn aka mi ye ko ke n̄kpọ nte hour inan̄ ye ubak, owo ekededi emi okokụtde nnyịn iso ke ima ikebehe ama ọfiọk ke isan̄ oro ikememke. Edi ke ima ikede esisịt idemede in̄wọn̄ ekpri kọfi, idem ama afiak enem nnyịn. Ke ima ikese se Bible etịn̄de aban̄a se iketịbede inọ Paul ke ini enye akakade isan̄, inyụn̄ ibọn̄ akam inọ Jehovah, ima iben̄e idem nditọn̄ọ ukwọrọikọ.

Mme odụn̄ isuo emi ẹtie ufan ufan ẹnyụn̄ ẹfọn ido. Mmọ ẹda nnyịn ẹdụk ufọk ẹnyụn̄ ẹnọ nnyịn n̄kpọ ida ibịt idem. Imọkwọrọ ikọ inọ mmọ, inyụn̄ iwụt esịtekọm ke mfọnido mmọ ke ndin̄wam mmọ ke ebiet oro ikemede. Nte isụk ikwọrọde ikọ inọ mma kiet, ima ikụt ke n̄kpọ kiet ke ufọkurua esie abiara, ntre owo nnyịn kiet ama ọdiọn̄ n̄kpọ oro ọnọ enye. N̄kpọ emi ama enen̄ede otụk mma emi tutu enye ọbọ n̄wed Ikọ Abasi emi ikọnọde enye onyụn̄ ọkọm nnyịn ke ukwọrọikọ nnyịn. N̄wan en̄wen ama ọkọm nnyịn n̄ko onyụn̄ ọdọhọ ete, “Utom Abasi ke mbufo ẹnam emi, idịghe utom owo. Se inamde ndọhọ ntre edi emi mbufo ẹdide utọ nsannsan isuo emi ẹdikwọrọ ikọ.”

Mme owo mi ẹnen̄ede ẹma mme n̄wed Ikọ Abasi oro inọde mmọ. Ete kiet ọbọ Enyọn̄-Ukpeme ye Awake! onyụn̄ ọdọhọ ifiak ida n̄wed nnyịn isọk imọ man ikpenyene se idikotde ke ini etuep. Owo en̄wen ọbọ mme n̄wed emi okot onyụn̄ ọbọ n̄ko obon ke itieutom esie man mbon emi ẹdide do ẹkpetiene ẹkot. Enye ọnọ nnyịn adres esie man isinọ Enyọn̄-Ukpeme ye Awake! ẹsọk enye kpukpru ọfiọn̄. Esịt enen̄ede enem ubon kiet ke ini iwụtde mmọ ke ẹsiak enyịn̄ isuo mmọ ke Bible. Mmọ n̄ko ẹma ẹbọ Enyọn̄-Ukpeme ye Awake!

Okposụkedi emi nte mbon isuo emi ẹkekopde eti mbụk ekenen̄erede enem nnyịn, isuo emi eti ndusụk nnyịn n̄kpọ emi anamde esịt obụn̄ọ nnyịn. Ufọk kiet emi ẹkesidọn̄de mbon emi ukara ẹsion̄ode ke obio odu ekpere Sarakíniko Bay. Mi ke ẹkekọbi Emmanuel Lionoudakis, kiet ke otu Mme Ntiense Jehovah ke utịt utịt iduọk isua 1930 ke ntak ukwọrọikọ.a Ẹkekot Gavdos ini oro “isuo emi n̄kpọ ndomokiet mîdụhe ke mîbọhọke ikpeyen. Ebiet emi ediwak . . . owo ẹkpan̄ade ke ntak ọ-biọn̄ ye udọn̄ọ. Ntak edi oro ẹnyụn̄ ẹkotde isuo emi isuo n̄kpa.” Brọda Lionoudakis ekesikọ iyak onyụn̄ esịn ifịk ọkwọrọ ikọ ọnọ mbon n̄kpọkọbi eken sia enye ikpọn̄ ekedi Ntiense do. Ndikụt ebiet emi enye okodude n̄kpọ nte isua 70 emi ẹkebede ama anam eyen esie, ebe eyen esie, ye eyeyen esie ẹkpere nditua. Edi nsọn̄ọnda esie ama enen̄ede anam nnyịn eken ibiere ndika iso nsịn idem n̄kwọrọ ikọ.

Imọfiọk ke ebiet emi ikenemke mbon oro ẹkekọbide mi. Edi enem nnyịn ndikwọrọ ikọ ke kpukpru itụn̄ ye inụk isuo emi utịturua emi. Imonyụn̄ inọ mme owo emi ẹtiede ufan ufan mi magazine 46 ye ndiye uduot n̄kpri n̄wed 9. Ọdọn̄ nnyịn ndifiak n̄kụt mmọ.

Itibọp enyịn itat ini unyọn̄ ekem. Edi uwat idifọnke idahaemi. Ntak edi oro isịkde ini unyọn̄ inịm n̄kanika ition mbubreyo. Imafiak idaha esụk ufọt okoneyo, imonyụn̄ iben̄e idem ndifiak n̄kụt afanikọn̄ ke akpa. Ke akpatre, imawat isio ke n̄kanika ita usiere. Oyobio afiak ọnọ nnyịn mfịna ke n̄kpọ nte hour ition mbemiso idide idisịm Crete. Idem emem nnyịn nte itọde ikpat ke obot, edi esịt enem nnyịn ke ndikaka n̄kanam mbon Isuo Gavdos ẹfiọk enyịn̄ Jehovah. (Isaiah 42:12) Kpukpru mbon emi ikasan̄ade ntre ẹma ẹkụt ke isan̄ emi ama enyene ufọn. Ibịghike, nnyịn iditịghi aba kpukpru se ikosobode ke akpa, edi tutu amama nnyịn idifreke nte ukwọrọikọ emi ekenemde eketre.

[Ikọ Idakisọn̄]

[Mme ndise ke page 24]

Trypití Cape, ata usụk usụk Europe

[Ndise ke page 25]

Sarakínico Bay, ufọk emi ẹkedọn̄de mbon oro ukara ẹkebịnde ke obio, ye itiat oro ẹwụkde ẹda ẹti mmọ

[Ebiet Ẹdade Ndise Ẹto ke page 25]

Courtesy of Hellenic Post