NDI AMA ỌFIỌK?

Ndi ẹma ẹfiak ẹbọp temple Jerusalem ke ẹma ẹkesobo enye ke isua 70 E.N.?

JESUS ọkọdọhọ ke owo idikpọn̄ke itiat kiet ke enyọn̄ itiat efen ke temple Jehovah, ndien ntịn̄nnịm ikọ emi ama osu ke ini mbonekọn̄ Rome emi Titus ekedide etubom mmọ ẹkesobode Jerusalem ke isua 70 E.N. (Matt. 24:2) Nte ini akakade, Akwa Edidem Julian ama aduak ndifiak mbọp temple emi.

Ẹdọhọ ke Julian ekedi akpatre akwa edidem emi ekedide okpono ndem. Enye ekedi eyen eyeneka Akwa Constantine, ndien mme inua-okot Christian ẹkenọ enye ukpep. Edi ke ẹma ẹkenam enye akwa edidem ke isua 361 E.N., enye ama etịn̄ an̄wan̄wa ete ke imọ inyimeke aba ukpep oro, onyụn̄ ọdọhọ ke imọ iyomke ndidụk inua-okot Ido Ukpono Christ eyo imọ, ke iyom ndikpono ibọk. Mme n̄wed mbụkeset ẹkot enye “owo mfiakedem.”

Julian ama enen̄ede asua mbon oro ẹkedọhọde ke idi Christian. Etie nte ntak kiet emi enye akasuade mmọ edi sia enye ama okụt nte ikpọ owo ufọkabasi ẹwotde ete esie ye mbonufọk mmọ ke ini enye ekedide isua itiokiet. Mme ewetmbụk ufọkabasi eset ẹdọhọ ke Julian ama esịn udọn̄ ọnọ mme Jew ete ẹfiak ẹbọp temple mmọ man ẹwụt ke Jesus ekedi prọfet nsu.a

Edi akpanikọ ke Julian ama aduak ndifiak mbọp temple emi. Owo itịmke ifiọk m̀mê enye ama ọtọn̄ọ ndibọp temple emi, ndien edieke edide ama ọtọn̄ọ, owo itịmke ifiọk se ikanamde enye etre. Se ifiọkde edi ke Julian ikakarake isịm isua iba ke ini ẹkewotde enye, ndien utom esie ama etiene enye akpa.